Dolları nə gözləyir? - PROQNOZ

Ölkələr və beynəlxalq təşkilatlar bir-birinin ardınca dollardan imtina etməyə başlayıb. Bu, dolların qəfil ucuzlaşmasına səbəb olub. Amma valyuta bazarında dolların alıcıları fəallaşıb və dolların məzənnəsinin aşağı düşməsinin qarşısı alınıb. 

Nə baş verir?

Mynews.az xəbər verir ki, bu suala Oxu.Az-a açıqlamasında rusiyalı iqtisadi analitik, “Delovaya Rossiya” ictimai təşkilatının eksperti Dmitriy Qolubovskiy cavab verib. 

Onun sözlərinə görə, rublun dollara olan məzənnəsinin XVIII əsrin sonlarından başlayan uzun tarixi var.

“1972-ci ildə ABŞ-da milli valyutanın qızıl məzmunu qəbul edilib ki, bu da dolların digər dövlətlərin valyutalarına uyğunlaşmasına imkan verirdi. Onun məzənnəsi yüzilliklər boyu stabil qalıb və praktiki olaraq dəyişməyib.

Hər şey İkinci Dünya Müharibəsindən sonra dəyişdi. Buna qədər dünyanın valyuta ehtiyatlarına dollarla yanaşı, Britaniya fundu da nəzarət edirdi. Müharibədən sonra dollardan istifadədən imtina edildi. Buna görə onun məzənnəsi kəskin şəkildə ucuzlaşdı”, - analitik qeyd edib. 

Müsahibimiz Avropa Birliyi və Çinin beynəlxalq hesablaşma vasitələri kimi milli valyutalarından istifadə qərarını verməsinə görə dolların kursunun enəcəyini proqnozlaşdırır. 

“Burada hər şey sadədir: beynəlxalq hesablaşmalar üçün dollardan az istifadə ediləcək və o, ucuzlaşacaq. Əslində isə, bundan sonra avronun məzənnəsinin qrafikinə baxmaq lazımdır.

Avro dollara nisbətən bahadır. Çünki avro həmişə dolları tədricən aradan götürürdü. Əvvəlcə Avropadakı ticarətdə avrodan istifadə olundu. Son illər dollar Avropa Birliyi və ABŞ arasındakı monetar siyasət səbəbindən bahalaşıb və fikrimcə, bu, müvəqqətidir”, - Qolubovskiy deyib. 

Ekspert hesab edir ki, dollar avroya nisbətən uzunmüddətli perspektivdə yeni minimumlara gedə bilər.

“Bu, yaxın 10 ildə mümkündür. Avronun məzənnəsi 1,7 dollara bərabər ola bilər. Dollar zəifləməyə başladıqda, beynəlxalq ticarətdə bu valyuta tədricən sıxışdırılacaq”, - o bildirib. 

Analitik əlavə edib ki, hələlik heç bir ölkə, hətta Türkiyə də dollardan tamamilə imtina etməyib. 

“Türkiyə və türk banklarının dollar qarşısında öhdəlikləri var. Ancaq Türkiyə, İran, Çin və hətta Rusiya dollardan imtina etmək niyyətindədir. Avropa Birliyi də bu sıraya qoşulub”, - analitik qeyd edib.