Qubada sel körpünü dağıdıb, müəllim və şagirdlər məktəbə gedə bilmir - FOTO

19:22 17.05.2017

Hadisə

Quba rayonunun Küsnət və Küsnətqazma kəndlərini birləşdirən yeganə piyada keçidi olan Qudyalçayın üzərindəki taxta körpünü sel dağıdıb.

"Report”un Şimal bürosu xəbər verir ki, mayın 11-də yağan güclü leysan yağışı nəticəsində yaranan sel kəndlər arasında gediş-gəlişi kəsib.

Geniş turizm potensialı olan Qubanın Küsnət və Küsnətqazma kəndləri rayon mərkəzindən 15 km uzaqlıqda yerləşir. Uzun illərdir burada yaşayan əhali Qudyalçayın üzərindən keçməklə bağlı çətinlik yaşayır. Çayın üzərində bir neçə dəfə körpü düzəldilsə də, sel yuyub aparıb. Sonuncu belə hadisə isə mayın 11-də baş verib.

Ötən gün kənd sakinləri taxtaları bir-birinə bağlayaraq müvəqqəti keçid düzəltməyə cəhd ediblər. Lakin taxtalar sındığından kənd sakini Səhhət Abbasov çaya yıxılıb. Onu son anda seldən xilas ediblər.

Körpünün olmamasına görə əsas çətinliyi məktəblilər və müəllimlər yaşayır. Məktəb Küsnətqazma kəndində yerləşdiyindən Küsnət kəndində yaşayan şagird və müəllimlər artıq 6 gündür məktəbə gələ bilmir.

Quba rayon Fövqəladə Hallar Komissiyasının sədri Yusif Abidov "Report”a açıqlamasında bildirib ki, hazırda planda hər hansı körpünün inşası yoxdur: "Şagirdlərin və müəllimlərin Küpçal kənd tam orta məktəbinə yerləşdirilməsi məsələsi müzakirə edilir. Gələcəkdə yolun uzun olmasını nəzərə alınaraq şagird və müəllimlər üçün avtobus da ayrıla bilər. Bu məsələni Təhsil Nazirliyi həll etməlidir”.

MƏNİM XƏBƏRLƏRİM

Hadisə

Sizin üçün seçdik

İndi oxunanlar

Həftənin hitləri

Mynews.az