Leyla Əliyeva sərgidə - FOTO

Dünyanın ən böyük macəra və ekstremal idman fotosərgisi “Illume” beynəlxalq turne çərçivəsində ilk dəfə Bakı şəhərində təqdim olunur.

Mynews.az AZƏRTAC-a istinadən xəbər verir ki, dekabrın 19-da Heydər Əliyev Mərkəzinin parkında “Illume” fotosərgisinin açılış mərasimi keçirilib.

Heydər Əliyev Fondunun vitse-prezidenti Leyla Əliyeva mərasimdə iştirak edib.

Tədbirdə çıxış edən Heydər Əliyev Mərkəzinin direktorunun müşaviri Emin Məmmədov bildirdi ki, bu gözəl parkda indiyədək bir sıra beynəlxalq tədbirlər keçirilib. Bu tədbirlərin sırasında “Səməni”, “Küknar” sərgiləri və “Çərpələng” beynəlxalq festivalını xüsusi qeyd etmək olar. Bu gün açılan “Red Bull Illume” sərgisi dünyada maraqla qarşılanır və Çikaqodan, Torontodan, Zalsburqdan sonra Azərbaycanın paytaxtında keçirilir. Bakıdan sonra isə bu sərgi Tokioda təşkil olunacaq.

Tədbirdə iştirak edən “Red Bull Illume” layihəsinin rəhbəri Ulriş Qril dedi ki, bu gün Bakıda 55 ən yaxşı macəra və idmana aid fotoşəklin təqdim olunması bizim üçün böyük şərəfdir. Heydər Əliyev Mərkəzinin parkında bir aya yaxın müddətdə fəaliyyət göstərəcək bu sərginin böyük uğur qazanacağına inandığını bildirən Ulriş Qril qeyd etdi ki, bu, “Red Bull Illume”nin Azərbaycanda ilk dayanacağıdır. O, Bakı turunun unudulmaz bir sərgi kimi yaddaşlara həkk olunacağına əminliyini ifadə etdi.

Sərgidə işıqlandırma mövzusuna uyğun olaraq “Image Quest 2016”-nın finalçı 55 fotoşəkli işıq qutuları üzərində nümayiş olunur.

Fotomüsabiqədə, həmçinin bu ilin noyabrında Azərbaycanda keçirilən milli mobil müsabiqədə iştirak edən və qalib gələn 5 fotoşəkil yer alıb.

Müsabiqənin birinci yerinin sahibi Fərman Lazımova, finalçılar Emin Əlizadəyə və Leyla Fətəliyevaya hədiyyələr təqdim olundu.

Sərgi 2018-ci il yanvarın 15-dək paytaxt sakinləri və qonaqlar üçün açıq olacaq. Girişin hər kəsə sərbəst olduğu sərgi çərçivəsində həftəsonları əlavə əyləncəli proqramlar da təşkil ediləcək.