“Azərbaycanda gənclərin maarifləndirmə işinin inkişaf perspektivləri” - VİDEO

Bu gün Bakı İslam Universitetinin Tələbə Gənclər Təşkilatı və Dünya Azərbaycanlı Gənclərinin Beynəlxalq Həmrəyliyi İctimai Birliyinin birgə təşkilatçılığı ilə Ümummilli lider Heydər Əliyevin anadan olmasının 95-ci ildönümünə həsr olunmuş “Azərbaycanda gənclərin maarifləndirmə işinin inkişaf perspektivləri” mövzusunda gənclər üçün tədbir keçirilib. Mynews.az-ın verdiyi məlumata görə, tədbir Azərbaycan Respublikasının Dövlət himninin səsləndirilməsi ilə başlayıb.

Tədbiri giriş sözü ilə gənc alim, Bakı İslam Universitetinin kafedra müdiri, siyasi elmlər üzrə fəlsəfə doktoru Elvin Talışınski açaraq Azərbaycanda gənclərin maaarifləndirmə işinin aparılmasının dövlət siyasətinin mühüm sahələrindən biri olduğunu qeyd edib. O, respublikamızda Ulu Öndər Heydər Əliyevin banisi olduğu gənclər siyasətinin davam etdirilməsi istiqamətində müasir cəmiyyətimizin maarifləndirilmə yolu ilə inkişafına, dövlətçiliyimizə və xalqımıza layiqincə xidmət etməyi qarşısına məqsəd qoymuş Azərbaycan gənclərinin ictimai fəallığının yüksək olduğunu bildirib.

Tədbirdə dövlət və ictimai xadimlər, tələbə gənclər təşkilatlarından bir çox dövlət və özəl ali təhsil müəssisələrinin gənc fəalları və mətbuat nümayəndələri iştirak edirdi. Tədbirin keçirilməsində əsas məqsəd gənclərin təhsil, elm və din sahəsində maarifləndirmə işinin inkişaf perspektivlərinin müəyyən edilməsi, bu sahədə dövlət dəstəyinin təmin edilməsi, Azərbaycan gənclərini birləşdirən gənclər təşkilatlarının rolunun müzakirə edilməsidir.

Tədbirdə həmçinin gənclər qarşısında YAP Gənclər Birliyi baş ofisinin kordinatoru, siyasi elmlər üzrə fəlsəfə doktoru Şəfəq Əhmədova, Dini Qurumlarla İş üzrə Dövlət Komitəsinin şöbə müdiri Nahid Məmmədov, İlahiyyatçı alim Şahin Həsənli, “SƏS” Media Qrupun rəhbəri, fəlsəfə üzrə fəlsəfə doktoru Bəhruz Quliyev, Azərbaycan televiziya və radio verlişləri QSC-nin baş prodüseri, respublikanın əməkdar mədəniyyət işçisi Hikmət Yaqubov və Dünya Azərbaycanlı Gənclərinin Beynəlxalq Həmrəyliyi İctimai Birliyinin prezidenti Tofiq Əlizadə çıxış ediblər.

Natiqlər tədbirin çox mühüm bir mövzuya toxunmasından, eyni zamanda Ulu Öndər Heydər Əliyevin də gənclərə xüsusi olaraq önəm verməsindən, daim gənclərə qayğı ilə yanaşmasından bəhs etdilər. Bundan əlavə olaraq natiqlər Azərbaycanda gənclər siyasətinin qarşısında duran əsas məqsədlər kimi gənclərin maarifləndirilməsi, intellektual səviyyəsinin artırılması, gənclərimizin və yeniyetmələrimizin elmə, təhsilə yiyələnmələrinə nail olunması, sosial fəaliyyətlərinin yüksək olması, onların arasında azərbaycançılıq ideologiyasının, milli-mənəvi dəyərlərin mənimsənilməsi, dövlət və hökumət strukturlarında geniş təmsil olunması və s. məsələləri vurğuladılar.

Sonra söz gənclərə verildi. Tədbirdə bir neçə dövlət və ali təhsil müəssisəsindən gənclər çıxış edərək mövzuya öz münasibətlərini bildiriblər.

Sonda “Azərbaycanda gənclərin maarifləndirmə işinin inkişaf perspektivləri” adlı gənclər tədbirinin iştirakçılarının xatirə fotoşəkli çəkilib.