İranlı generalı öldürülməsinə niyə yas saxlamalıyıq?

ABŞ-ın keçirdiyi əməliyyat nəticəsində İraqda öldürülən iranlı general Qasım Süleymani ilə bağlı Azərbaycan cəmiyyətinin reaksiyası adekvat olmadı. Başqa bir ölkə generalının başqa bir ölkədə öldürülməsi sanki cəmiyyəti 2 yerə böldü. Kimisi onu "şəhid", kimisi də "qatil" adlandırdı. Ancaq təbii ki, bu yanaşmaların heç biri real situasiyaya adekvat deyil.

Birincisi, şəhid öz vətəni, torpağı, dini və namusu uğrunda canını fəda edənlərə deyilir. Süleymani bu kateqoriyaların heç birinə daxil deyil. Eyni zamanda "Süleymani gəbərdildi" ifadəsi də etik deyil. Başqa bir ölkənin güneralı başqa bir dövlətlə münaqişədə qətlə yetirilib. Öldürülməsəydi o öldürəcəkdi. Söhbət siyasi və iqtisadi maraqlar mübarizəsindən gedir.   Şiəçiliyə gəldikdə isə, Qarabağda da əsasən şiə əhalisi idi, ancaq İran Azərbaycanın yanında  olmadı, əksinə, Erməistana dəstək oldu. Elə bu gün bəzilərinin "şəhid" adlandırdığı general Ermənistanın dostları siyahısında olub (şəkillərə bax).  Dövlət maraqları baxımından yanaşdıqda İranı anlamaq olar - bəlli səbəblərdən İrana güclü və müstəqil Azərbaycan lazım deyil. Ona görə də əhalisi əsasən şiələrdən ibarət olan Azərbaycana yox, xristian Ermənistana dəstək verdi - dövlət maraqlarının hətta dini maraqları belə üstələməsi müasir dünyada geniş yayılıb və istənilən qədər misallar gətirmək olar.         Ancaq bu da Süleymaninin öldürülməsinə sevinməyə əsas vermir. İran bizim qonşumuzdur və Azərbaycanın ərazi bütövlüyünü rəsmən tanıyır. Qətllə bağlı Azərbaycanın xarici işlər nazirliyi rəsmi qaydada İrana başsağlığı verdi və bununla kifayətlənmək olardı. Ancaq Süleymanini az qala "Milli qəhrəman" səviyyəsinə qaldırmaq nə deməkdir? Azərbaycan 20 yanvar faciəsində 147, Qarabağ savaşında isə 12 minə yaxın şəhid verib, xeyli Milli Qəhrəmanımız, könüllü şəhidliyə yollanan insanlarımız olub. Onları kənara qoyub, başqa bir ölkənin generalını "qəhrəman" elan etmək nə dərəcədə düzgün və məntiqlidir? Bəs milli və dövlət maraqları harda qaldı? Başqa bir ölkənin öz dövlətinin siyasi və iqtisadi maraqlarına görə öldürülən generalına yox, öz şəhidlərimiz yas saxlamalıyıq, onların adlarını yaşatmalıyıq - bunu bizdən həm də öz dövlətimizin maraqları tələb edir.   Mənbə: İstiqlal.az