Pişik Günel ailə sirlərini açdı - "Çılpaq fotolarım yoxdur, uşağımın atası..."

Mynews.az yenicag.az-a istinadən müğənni Günel Ələkbərlinin müsahibəsini təqdim edir:

Bir vaxtlar efirdə, şou-biznes tədbirlərində tez-tez gözə dəyirdi. Elə adı da qalmaqallarda ən çox hallanan müğənnilər sırasında idi. Sonradan ailə qurdu, qız anası oldu. Çoxdandır görünməyən, səs-sorağı gəlməyən Günel Ələkbərlini deyirəm.

– Günel ana olandan sonra, şou-biznes aləmindən çəkildin, səni görə bilmirik…
– Analıq tamam fərqli və müqayisəolunmaz duyğudur. Övladım və ailəm mənim üçün birincidir. Sonra sənət gəlir. Dəvət aldığım tədbirlərə və verilişlərə gedirəm.

– Olmaya həyat yoldaşın sənətinə qadağa qoyub?
– Yox. O bilir ki, 2003-cü ildən bu sənət aləmindəyəm və məni seçəndə də müğənni olduğumu bilirdi. Sadəcə olaraq, vaxtımın çoxunu övladıma və ailəmə həsr etmək istəyirəm.
– Analıq Güneldə nəyi dəyişdi?

– Həyata baxışımı, insanlara münasibətimi.

– Bəs qarderobda? Bir vaxtlar cəsur geyimlərinlə hər kəsi təəccübləndirirdin…
– Düzdür, çılpaq fotolarım yayılmayıb, amma təsadüfən çimərlikdə çəkdirdiyim şəkillərim olub. Zamanında açıq-saçıq libaslar geyinmişəm. Amma indi qarderobumda dəyişiklik çoxdur. Qısa ətəklər də geyinirəm, dekoltelər də. Amma əndazəni aşmiram. Çünki həm anayam, həm də artıq yaşa doluram axı.



– Həyat yoldaşın səndə ən çox hansı xüsusiyyəti bəyənir?

– Onu desəm, deyəcəklər Günel özünü tərifləyir.
– Yaxşı, onda hansı xüsusiyyətin həyat yoldaşının xoşuna gəlmir?
– Deyir, deyingənsən. Deyingənliyim də xırda məişət problemləri üstündə olur: “bu ayaqqabını niyə burda yox, orda çıxartdın”, “bu stəkanı niyə bura qoydun” və s.
– Həyat yoldaşın deyirsə “qatıq qaradır”, sən də razılaşırsan, yoxsa…

– Mütləq. Amma sonda mən deyəni deyir. Qadın böyük qüvvədir axı.

– Olubmu qısa ətəkdə, ya da dekolte geyimdə evdən çıxmısan, yoldaşın deyib ki, get əynini dəyiş?

– Heç qapıdan çıxmağa imkan verməyib, sözünü evdə deyib. Mən də əynimi dəyişmişəm. Əslində, onun nəyi bəyənib-bəyənmədiyini çox gözəl bilirəm və çalışıram ki, əsəbiləşməsi üçün ona əsas verməyim.

– Qayınatan, qayınanan varmı?

– İkisi də var.

– Həyat yoldaşının valideynlərinə necə gəlinsən? Münasibətləriniz necədir?

– Ölürlər məndən ötrü, ürəkləri gedir. (gülür)
– Doğrudan?
– Münasibətimiz yoxdur, amma yoldaşımın valideynləri mənim üçün də əziz adamlardır. Adama deyərlər, ərin yaxşıdır, atası, anası pis? Yox, mən həmişə onlara hörmətlə yanaşmışam.

– Bəs uşaq dünyaya gələndən sonra barışmadınız?

– Çox dərinə getməyək.

– İkinci dəfə ana olmağı planlaşdırırsan?

– Əlbəttə. Maddi imkanlarımız yaxşı olsa, ikinci övladımın da dünyaya gəlməsini istərdim. İnşallah.