Şagirdlərin qiymətləndirilməsində dəyişiklik olacaq

Gələn tədris ilindən azyaşlı şagirdlər üçün kiçik və böyük summativlərdə dəyişiklik nəzərdə tutulur.

Mynews.az xəbər verir ki, bunu Milli Məclisin (MM) Elm və təhsil komitəsinin iclasında çıxışı zamanı təhsil naziri Ceyhun Bayramov deyib. 

Nazir qeyd edib ki, Təhsil Nazirliyinin nəzdində fəaliyyət göstərən Təhsil İnstitutu ilə birlikdə bu istiqamətdə işlər həyata keçirilir, tədqiqatlar aparılır:

“Düşünürəm ki, xüsusi olaraq aşağı yaş qrupunda olan şagirdlər üçün kiçik və böyük summativlərdə növbəti tədris ilində bir sıra dəyişikliklər nəzərdə tutulacaq”.

Nazir deyib ki, respublika fənn olimpiadalarında iştirak edən şagirdlərin ali məktəblərə imtahan zamanı göstərdiyi nəticələr onlarda var.

C.Bayramovun sözlərinə görə, onların qəbul imtahanında olan nəticələri ilə olimpiadada iştirak etdikləri fənlər üzrə elə də böyük fərq yoxdur.

Nazir bildirib ki, aşağı nəticə coğrafiya fənnindən qalib gələn şagirdlərdə müşahidə olunur ki, onların da topladığı orta bal 648-dir:

“Riyaziyyatdan qalib olan şagirdlərin topladığı orta bal isə 686-dır. Bu bir daha onu sübut edir ki, orta səviyyəli istedada malik olan şagird respublika fənn olimpiadasında yer qazana bilməz. Bu, mümkün deyil. Bu şagirdlər 8-ci sinifdən olimpiadalarda iştirak edirlər. Burada müşahidə edirik ki, onlar 10-11-ci sinifə çatanda olimpiadalara üz tutmurlar.

Respublika fənn olimpiadasının fərqli proqramı var və buna xüsusi hazırlaşmaq lazımdır. Onlar da qəbul imtahanlarına görə hazırlıqlara getdiklərindən bu istiqamətdə hazırlaşmırlar”.