Bu gün Baş nazirin müavini Əli Əhmədov Türkiyənin Azərbaycan Respublikasındakı yeni səfiri Erkan Özoralla görüşüb. Mynews-un verdiyi məlumata görə, Azərbaycan Respublikasının beynəlxalq aləmlə inteqrasiyasında, regional təhlükəsizliyin qorunmasında və ümumiyyətlə, ölkəmizin siyasi-iqtisadi, elmi-mədəni maraqlarının reallaşdırılmasında Türkiyə ilə hərtərəfli əməkdaşlığın genişləndirilməsinə xüsusi önəm verildiyini qeyd edən Baş nazirin müavini bütün sahələrdə bu əlaqələrin uğurla inkişaf edərək, ölkələrimiz arasında strateji tərəfdaşlıq münasibətlərinin yüksək səviyyəyə çatdırılmasına səbəb olduğunu bildirib.
Əli Əhmədov Türkiyə və Azərbaycanın öz tarixlərinin ən mürəkkəb dövrlərində bir-birinə dəstək olduqlarını xüsusi vurğulayıb, bu münasibətlərin inkişafına yönəldilmiş ardıcıl və məqsədyönlü siyasətin hər iki ölkənin dövlət başçıları tərəfindən inkişaf etdirilməsi sayəsində strateji tərəfdaşlığın daha da dərinləşməsinə nail olunduğunu qeyd edib.
Səfir Erkan Özoral səmimi qəbul üçün təşəkkürünü bildirərək, Türkiyə-Azərbaycan münasibətlərinin yüksələn xətt üzrə inkişafından məmnunluğunu ifadə edərək, xalqlarımızın əsrlər boyu dostluq, qardaşlıq münasibətlərində yaşadığını və bu əlaqələrin hazırda daha da zənginləşdiyini, yeni səviyyəyə yüksəldiyini qeyd edib. Qonaq Türkiyə-Azərbaycan əlaqələrinin bundan sonra da uğurla, sürətlə və mütəşəkkil qaydada irəliyə getməsi, xalqlarımızın daha da birləşməsi və sıx əməkdaşlıq etməsi üçün bütün səylərini əsirgəməyəcəyini vurğulayıb.
