Rusiya bankı Azərbaycandakı kapitalını rekord səviyyədə artıracaq

İqtisadiyyat

12:51 24.01.2018

Azərbaycan Respublikasının prezidenti İlham Əliyev Davosda “VTB Bank”ın prezidenti, idarə heyətinin sədri Andrey Kostin ilə görüşüb. 

Mynews.az xəbər verir ki, Andrey Kostin “VTB Azərbaycan”ın fəaliyyətlərini inkişaf etdirmək əzmində olduqlarını deyib.

O bildirib ki, 2018-ci ilin birinci yarısında bank kapitalının həcmini artıraraq 265 milyon manata çatdıracaq.

“VTB Bank”ın prezidenti qarşılıqlı investisiya imkanlarının öyrənilməsinin əhəmiyyətindən danışıb.

O deyib ki, Azərbaycan Dövlət Neft Fondu ilə uğurlu əməkdaşlıq ediblər. Bu işlərdə verdiyi dəstəyə görə prezident İlham Əliyevə minnətdarlıq edib.

Prezident İlham Əliyev ölkəmizin “VTB Bank”la əməkdaşlığının genişləndirilməsindən məmnunluğunu ifadə edib, Azərbaycan Dövlət Neft Fondunun “VTB Bank”ın fəal səhmdarlarından biri olduğunu vurğulayıb. Dövlətimizin başçısı Azərbaycan tərəfinin “VTB Bank”la əməkdaşlığın genişləndirilməsində maraqlı olduğunu deyib və bu əməkdaşlığın ölkəmizdə özəl sektorun fəaliyyətinin genişləndirilməsinə töhfə verəcəyinə əminliyini bildirib.