SOCAR Baltikyanı limanlardan dünya bazarlarına mazut çıxaran ən iri ixracatçılardan birinə çevrilir.
Mynews.az-xəbər verir ki, bu barədə “Trend” ölkənin neft-qaz bazarında olan mənbəyə istinadən məlumat yayıb.
Agentliyin müsahibinin sözlərinə görə, yanvar ayında SOCAR dünya bazarlarına Baltikyanı limanlardan 320 min tona yaxın mazut göndərib.
“SOCAR məhsulu Belarus Dövlət Neft Şirkəti BNK-dən alır, daha sonra isə Latviyanın Ventspils və Litvanın Klayped limanlarından ixrac edir. Yanvar ayında SOCAR Ventspildən Maltaya 120 min ton, Klaypeddən isə 200 min tondan çox mazut göndərib”, - deyə mənbə bildirib.
Şirkət Baltikyanı bölgədən dünya bazarlarına mazut çıxaran ən iri ixracatçılardan birinə çevrilməkdədir.
