Azərbaycanda istehsal olunan avtomobillər gələn həftədən satışa çıxarılır

İqtisadiyyat

17:48 08.06.2018

Neftçala sənaye məhəlləsindəki Azərbaycan-İran birgə zavodunda istehsal olunan “Khazar” avtomobillərinin alışı üçün artıq 40 sifariş daxil olub.

Mynews.az-ın trend.az-a istinadən verdiyi məlumata görə, bunu zavodun sahiblərindən biri olan “AzərMaş” şirkətinin İdarə heyətinin sədri Emin Axundov deyib.

O bildirib ki, ilk sifarişçilər dövlət strukturları – İqtisadiyyat, Energetika və Vergilər nazirlikləri olub. Bu günədək zavodda 100-ə yaxın avtomobil istehsal olunub.

E.Axundovun sözlərinə görə, avtomobillərin satışı gələn həftənin əvvəlində başlayacaq. İlk mərhələdə “Khazar SD” və “Khazar LD” modelləri satışa çıxarılacaq. Satışlar Bakıda 3 satış mərkəzində həyata keçiriləcək.

“Khazar SD”-nin satış qiyməti 16 min manat, “Khazar LD”-nin satış qiyməti 18 min manat təşkil edəcək.

O əlavə edib ki, avtomobilləri 20 faiz ilkin ödənişlə lizinqə və ya 50 faiz ilkin ödənişlə kreditə almaq olar. Aylıq ödəmə 18 faiz təşkil edəcək.

Zavodda istehsal olunan bütün avtomobillər Avro-5 standartına cavab verir.