Generalın oğlu yenidən həbs olundu Bakıda

Hadisə

18:25 11.07.2017

Səfərbərlik və Hərbi Xidmətə Çağırış üzrə Dövlət Xidməti rəisinin müavini Novruzəli Orucovun oğlu yenidən həbs olunub.

Əvvəllər çoxsaylı yol hərəkəti qaydalarını pozduğuna görə avtomobil idarə etmək hüququndan məhrum edilmiş Rüstəm Orucov iyulun 3-də yenidən saxlanılıb.

Belə ki, Rüstəm Orucov 10-OG-300 nömrəli,  BMW markalı avtomobili idarə edərkən yol hərəkəti qaydalarını pozub.

Bu zaman 8 saylı marşrut avtobusunun sürücüsü Sənan Səmədov ona irad bildirib.

Mynews.az  xəbər verir ki,  Azərbaycan Baş Prokurorluğu Mətbuat xidmətinin rəhbəri Eldar Sultanov virtualaz.org-a bildirib ki, Rüstəm Orucov avtobus sürücüsünün iradına cavab olaraq onu döyüb.

Xatırladaq ki,  R.Orucov 2014-cü ildə piyadanı vuraraq hadisə yerindən qaçdığına görə 4 il azadlıqdan məhrum edilib.

Cəza müddətinin 1/3 hissəsini çəkdiyinə görə  R.Orucov vaxtından əvvəl şərti azadlığa çıxıb.

İyulun 4-də Binəqədi Rayon Polis İdarəsi R.Orucov barəsində Cinayət Məcəlləsinin 221.2.1 maddəsi üzrə cinayət işi açıb. Məhkəmənin qərarı ilə o, həbs olunub.