Rüşvət verməkdə təqsirləndirilən keçmiş vəkilin cəzası azaldılıb

Ali Məhkəmədə rüşvət verməkdə və vəzifə saxtakarlığında təqsirləndirilən keçmiş vəkil Əliabbas Rüstəmov məhkəmə qərarından verdiyi kassasiya şikayətinə baxılıb.

“Report”un xəbərinə görə, hakim İmran Hacıqayıbovun sədrliyi ilə keçirilən prosesdə qərar elan olunub. 

Qərara əsasən, Ə.Rüstəmovun ittiham olunduğu Cinayət Məcəlləsinin (CM) 313-cü (vəzifə saxtaraklığı) maddəsi ilə verilmiş ittiham üzrə cinayət məsuliyyətinə cəlbetmə müddəti keçdiyi nəticəsinə gəlinib. Buna görə də ona həmin maddə ilə cəza təyin edilməyib. 

Məhkəmə Ə.Rüstəmovu CM-nin 312.2-ci (rüşvət vermə, vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə və ya təkrar rüşvət vermə) maddəsi ilə təqsirli bilib və onun cəzasınını 7 ildən 6 ilə endirib. 

Qeyd edək ki, 2014-cü ilin iyun ayının 30-da Baş Prokurorluğun mətbuat xidmətinin yaydığı məlumata əsasən, “Yasavul” MMC-nin direktoru olan keçmiş vəkil Ə.Rüstəmovun qanunsuz hərəkətləri barədə Baş prokuror yanında Korrupsiyaya Qarşı Mübarizə Baş İdarəsinə daxil olmuş müraciət əsasında istintaq-əməliyyat tədbirləri həyata keçirilib. Ə.Rüstəmov Vergilər Nazirliyinin Vergi Cinayətlərinin İbtidai Araşdırılması Departamentinin İstintaq İdarəsində Beyləqan rayon sakini barəsində Cinayət Məcəlləsinin 213.2.2-ci (vergi ödəməkdən yayınma) maddəsi ilə başlanmış cinayət işi üzrə cinayət təqibinə xitam verilməsi və sonuncunun cinayət məsuliyyətindən azad olunması barədə vəd verib. O, guya işin ibtidai istintaqını aparan şəxsə 90 min manat məbləğində rüşvət verilməsi üçün rayon sakinindən cəmiyyətin ofisində 95 min manat məbləğində pulu alarkən cinayət başında saxlanılıb.
Baxış zamanı Ə.Rüstəmovun üzərindən 95 min manat məbləğində nağd pul, habelə xidməti otağından ibtidai istintaq üçün əhəmiyyət kəsb edən sənədlər aşkar edilərək götürülüb.
O, CM-nin 312.2-ci (rüşvət vermə, vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə və ya təkrar rüşvət vermə) və 313-cü (vəzifə saxtakarlığı) maddələri ilə ittiham olunub.

Bakı Ağır Cinayətlər Məhkəməsinin hökmü ilə Ə.Rüstəmov 7 il müddətinə azadlıqdan məhrum edilib. Hökmdən narazı qalan Ə.Rüstəmov apellyasiya şikayəti verib. Bakı Apellyasiya Məhkəməsinin qərarına əsasən onun apellyasiya şikayəti təmin edilməyib, birinci instansiya məhkəməsinin çıxardığı qərar dəyişdirilmədən saxlanılıb.
Xatırladaq ki, Ə.Rüstəmov əvvəllər Vəkillər Kollegiyasının üzvü olub.