Rusiyada yaşayan azərbaycanlı iş adamı Telman İsmayılovun ətrafındakı çəmbər getdikcə daralır.
Mynews.az Ölkə.Az-a istinadla xəbər verir ki, İstintaq Komitəsi Telmana qiyabi ittiham irəli sürmək məsələsini nəzərdən keçirir. Buna səbəb isə, istintaqa yeni şahidin cəlb edilməsidir. Bu şahid İsmayılovlar ailəsinə məhrəmdir. O, İsmayılov qardaşlarının "koptevlər" qruplaşması liderlərini qətlə yetirməsi barədə ifadə verib.
Rusiya hüquq-mühafizə orqanları bildirir ki, Telmanın ev və villalarında aparılan axtarışlar cinayət işində yeni məlumatların ortaya çıxması ilə əlaqəlidir. İş adamı Sergey Qavryuşin istintaqla aktiv əməkdaşlığa başlayıb.
Sergey 15 ildən çox Rafiq İsmayılovun köməkçisi olub, bütün təsərrüfat işlərinə cavabdeh olub və Telmanın əmrlərini icra edib. Eyni zamanda, Qavryuşin "Merkuriy-R" şirkətinin baş direktorudur. Bu şirkət "Çerkes" bazarının bağlanmasından sonra bir sıra ticarət nöqtələrinin sahibi olub. Şirkət Rafiq İsmayılov həbs edildikdən sonra - 2016-cı ildə ləğv edilib.
Mənbə bildirir ki, Qavryuşin faktiki olaraq Rafiqin "kölgəsi" olub və qardaşlar onun yanında açıq söhbət etməkdən çəkinməyiblər. Sergeyin ifadələri əsasında İsmayılovlar ailəsinin 2000-ci ildə iş adamı Andrey Lobanovun qətlə yetirilməsi və digər cinayətlərlə əlaqəsi müəyyən edilib. Qavryuşin isə şahidlərin müdafiəsi proqramına cəlb edilib.
Bir müddət əvvəl isə Rafiqin sağ əli Harri Belotserkovskiy istintaqla əməkdaşlığa başlamışdı. Onun ifadələrinə əsasən, Harri 2000-ci ildə Rafiqlə "Praqa" restoranına gedib. Burada o, Rafiqin Telmanla söhbətinə şahid olub. Söhbət vaxtı qardaşlar arasında Andrey Lobanovun qətli və bu cinayətin detalları müzakirə edilib.
2000-ci ilin dekabr ayında Rafiqin iki adamı Lobanov və onun cangüdəninə atəş açıb. "Avtoritet" aldığı yaralardan keçinib, cangüdəni isə ağır yaralarla xəstəxanaya yerləşdirilib.
Hazırda ifadələr yoxlanılır, digər məlumatlar toplanır. Bu iş bitdikdən sonra Telman İsmayılova qarşı bir sıra prosessual qərarlar qəbul ediləcək.
İsmayılov qardaşları qanunsuz silah saxlama, qanunsuz bank fəaliyyəti, yanğın törətmə və iki nəfərin qətlində ittiham edilir. Bundan başqa, 3 nəfərin ölümü, qəsdən əmlakı məhvetmə maddələri ilə də iş açıla bilər. Qardaşların qurbanı əsasən "koptevski" qruplaşmasının üzvləri və qruplaşma ilə əlaqəsi olan iş adamlarıdır.
İki tərəf arasında münaqişəyə səbəb bir sıra topdansatış bazarlarına nəzarət olub. 1990-cı illərin sonunda İsmayılovlar ailəsi Şimal administrativ dairəsindəki obyektlərə "göz qoyublar". Bu obyektlərin böyük əksəriyyəti isə Andrey Lobanovun qruplaşmasına aid olub. Nəticədə iki tərəf arasında münaqişə başladı və Lobanov qətlə yetirildi.
Sonradan isə İsmayılovlar Lobanovun yerinə keçənlərlə müharibəyə başladılar. 5 il ərzində ən azı 7 avtoritet qətlə yetirilib. 2005-ci ildə Lianozovosk bazarının yandırılması bu müharibənin əsas akkordu oldu.
Rafiq İsmayılov saxlanılıb, onun qardaşı, DİN-in sabiq əməkdaşı Vaqif isə axtarışa verilib. Bu dəfə isə qara buludlar Telmanın başı üzərində fırlanır.
