Bakı sakinləri yaxın qohumlarının evini yardı 6 min manat-FOTO

Hadisə

14:10 09.02.2018

Azərbaycanda oğru yaxın qohumunun evini qarət edib. 

DİN Mətbuat Xidmətinin Şəki regional qrupundan Mynews.az-a verilən məlumata görə, rayonun Fazıl kənd sakini İ.Məmmədov Şəki ŞRPŞ-yə müraciət edərək ona məxsus evdən ümumi dəyəri 6000 manat dəyərində qızıl-zinət əşyalarının, 110 manat dəyərində bijuteriya və 600 ABŞ dollarının oğurlandığını bildirilib.

Məlumatla əlaqədar polis əməkdaşlarının isti izlərlə keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakinləri, yaxın qohum olan İlham Məmmədov və Məftun Mustafayev qısa zamanda müəyyən olunaraq saxlanılıblar. Saxlanılan şəxslərin ev sahibi İ.Məmmədovun yaxın qohumları olduğu məlum olub. Onlar ifadələrində ev sakinlərinin diqqətini yayındırmaq üçün əvvəlcə həyətyanı sahədəki tövləyə qəsdən od vurduqlarını və daha sonra yaranmış şəraitdən istifadə edərək oğurluq məqsədilə evə daxil olduqlarını bildiriblər. M.Mustafayevin etibarnamə ilə icarəyə götürdüyü avtomobilə baxış zamanı onun salonundan 2 ədəd idman papağından hazırlanmış maska, saxlanılan şəxslərin üzərindən isə oğurlanmış qızıl-zinət əşyaları maddi sübut kimi götürülmüşdür.

Saxlanılan şəxslərin digər cinayət əməllərinin törədilməsində iştiraklarının olub-olmamasının müəyyən edilməsi istiqamətində tədbirlər davam etdirilir.

Faktla bağlı araşdırma aparılır.