Bu gün Şəmkir rayonunun Dəllər Cırdaxan kəndində baş vermiş dəhşətli yanğınla bağlı bəzi məqamlar üzə çıxıb. Mynews.az Lent.az-a istinadən xəbər verir ki, 33 yaşlı Anar Cəfərovun yanaraq öldüyü ev onun bir müddət əvvəl vəfat etmiş babasına məxsus olub. Belə ki, valideynləri boşanandan sonra onun Gəncədə yaşayan anası Türkiyəyə işləməyə gedib. Anar Cəfərov isə babasının Şəmkirdəki evində yaşamağa başlayıb. Dayısıgil Rusiyaya köçdüyündən o, burada tək yaşayırmış və günəmuzd fəhləliklə məşğul olurmuş.
Məlum hadisəyə gəlincə, maddi cəhətdən imkansız olduğundan A.Cəfərov elektrik enerjisinin pulunu ödəyə bilmirmiş və bu səbəbdən evə gələn xətt kəsilib. Buna görə də o, gecələr evi işıqlandırmaq üçün şamdan istifadə edirmiş. Həmin şamdan başlayan yanğın mənzildə güclü tüstü yaratdığından 33 yaşlı kişi evi tərk edə bilməyib və otaqda tamamilə yanaraq ölüb.
Qeyd edək ki, A.Cəfərov subay olub.
Faktla bağlı araşdırmalar aparılır.
*****
10:15
Bu gün Şəmkir rayonunda ölümlə nəticələnən yanğın baş verib.
Mynews.az Fövqəladə Hallar Nazirliyinin saytına istinadən xəbər verir ki, Dəllər Cırdaxan kəndində vətəndaşa məxsus ümumi sahəsi 150 m2 olan kürsülü birmərtəbəli 3 otaq və aynabənddən ibarət evin yanar konstruksiyaları 150 m2 sahədə, ona bitişik tikilmiş, ümumi sahəsi 120 m2 olan 3 otaqlı köməkçi tikilinin yanar konstruksiyaları və ümumi sahəsi 80 m2 olan talvarın yanar konstruksiyaları yanıb. Yanğının kəşfiyyatı zamanı 1984-cü il təvəllüdlü Cəfərov Anar Cavanşir oğlunun yanmış meyiti yanğınsöndürənlər tərəfindən aşkar edilərək aidiyyətı üzrə təhvil verilib. Evin qalan hissəsi yanğından mühafizə olunub. Yanğın saat 09:30-da yanğınsöndürənlər tərəfindən söndürülüb.
