Ukraynanın Poltava, Xmelnitski və Vinnitsa vilayətlərində içərisində Azərbaycan şirkətlərinə məxsus yüklərin olduğu daha 3 ağır tonnajlı maşın oğurlanıb.
Yük maşınlarından birinin daşıyıcılığını həyata keçirən “Sufaris-Transport” şirkətinin rəhbəri Sübhan Sarıyev APA-ya bildirib ki, yükü kərə yağı olan maşın Poltava ərazisində yoxa çıxıb.
Yük Azərbaycan investisiyalı “Dapra LTD” şirkətinə məxsusdur. S. Sarıyev qeyd edib ki, yük avtomobilinin sürücüsü Oleksandr Simishko tapılıb və polisə ifadə verib: “Onun ifadəsindən maraqlı faktlar üzə çıxıb. Sürücü bildirib ki, yük yola salınan zaman maşında nasazlıq olub, maşının sahibi Sergey Mixayluk xaricdə səfərdə olduğu üçün ona nəzarət üçün təhkim olunmuş Kiril adlı şəxsə zəng edib. Kiril maşının ona verməsini və gözləməsini bildirib. Lakin sonradan nə Kirildən, nə də maşından xəbər çıxıb”.
Digər Azərbaycan şirkətinə göndərilən konserv üçün xammallardan ibarət yük maşınlarından birinə cavabdehlik daşıyan Dmitri Mixaylus isə bildirib ki, onlara məxsus bir yük maşını Xmelnitski, digər eyni yüklü (Azərbaycana göndərilən) maşın isə Vinnitsa vilayətində oğurlanıb. Onun sözlərinə görə, yüklərin maşınların sahibi olduğu ukraynalılar tərəfindən "yoxa çıxarıldığı" ehtimal olunur: "Hər maşında yük təxminən 300000 ABŞ dolları dəyərindədir".
Son günlər Ukraynanın Kiyev də daxil olmaqla müxtəlif vilayətlərində içərisində Azərbaycan şirkətlərinə məxsus yüklərin olduğu daha 5 maşın oğurlanıb.
“Azərsun Holding”in mətbuat xidmətinin rəhbəri Afiq Səfərov bildirib ki, oğurlanan maşınlardan birindəki yük onların şirkətinə məxsusdur. A. Səfərov yükün nədən ibarət olması barədə məlumata malik olmadığını bildirib. O, içərisində digər Azərbaycan şirkətlərinə məxsus yüklərin olduğu maşınların Ukraynada oğurlanması barədə onlarda məlumat olduğunu da deyib.
Bir müddət əvvəl Ukraynada içərisində Azərbaycan şirkətlərinə məxsus yüklərin olduğu oğurlanan 10 maşından 2-dəki yüklərin çatdırılmasına cavabdehlik daşıyan azərbaycanlı iş adamı, İvano-Frankovsk vilayəti Azərbaycanlıları Konqresinin sədri Mətləb Nəcəfov bildirib ki, onun cavabdehlik daşıdığı yüklərin oğurlanmasında maşınların məxsus olduğu yerli “Transimpeks LTD” şirkətinin əli olduğu ehtimal edilir: “Çox təəssüf ki, yerli hüquq-mühafizə orqanları bu işlə ciddi məşğul olmur və nəticə yoxdur. Ehtimal edirik ki, maşınların oğurlanmasında şübhəli bilinən maşın sahibləri ümumi şəbəkəyə xidmət edir. Bu, biz azərbaycanlı iş adamlarını ciddi narahat edir. Məsələ ilə bağlı Azərbaycanın Ukraynadakı səfirliyinə müraciət etsək də, heç bir nəticə yoxdur".
Qeyd edək ki, bir müddət əvvəl Ukraynada Azərbaycan şirkətlərinə məxsus yüklərin olduğu 10 ağır tonnajlı maşın oğurlanıb. Maşınlar yükləri ilə birdə Ukraynanın Xmelnitski və Çerniqov vilayətlərində yoxa çıxıb.
