"Anam 8 aylığımda abort etdirdi, amma sağ qaldım" anasını bağışlayan qadın - FOTOLAR

1977-ci il, 29 avqust. Çəkisi 1 kiloqramda azca çox olan balaca qız yeni doğulmuş uşaqlar üçün bölmədə borucuqlar və naqillər arasındadır. O, ölümlə mübarizə aparır.

Fəqət, körpənin sağ qalmasını istəyən valideynlər yaxınlıqda gözə dəymir.

Melissa Odenin anası ABŞ-ın Ayova ştatındakı xəstəxananı tərk etmişdi və düşünürdü ki, hamiləliyin 8-ci ayında abort etdirdiyi üçün bətnindəki körpə ölüb.

Abort uğursuz oldu, amma Melissanın anası 36 il ərzində bilmədi ki, qızı sağ qalıb.
Melissa yaşamının dramatik başlanğıcından xəbər tutandan sonra tam 20 il suallara cavab aradı. Sonucda bəlli oldu ki, anası abort etdirmək istəmirdi.

Melissa onu da öyrəndi ki, sağ qaldığına görə tibb bacısına borcludur. Həmin tibb bacısı "tibbi tullantı" kimi qutuya atılmış uşağın asta səsini eşitmişdi.

Digər tibb bacısı isə palatadakı həmkarlarına deyibmiş: "Səsi gəlir?! Cəhənnəmə ki! Qoyun, ölsün!"
O tibb bacısı Melissanın nənəsi idi.

Yaşamı barədə belə təfərrüatları öyrənən başqa adam sərt, qəddar olardı. Amma onu sevən insanların övladlığa götürdükləri Melissa doğma anasını arayıb, tapıb və həmin qadını bağışlayıb.

"Öyrəndim ki, anamın 19 yaşı olanda onu aborta xəstəxanada tibb bacısı işləyən nənəm vadar edibmiş. Anam sağ qaldığımı bilmirdi. Həqiqəti bilənədək 30 il keçdi. Bu, utanc və hirsdən inam və əfvə gedən uzun, ağrılı yol idi", - Melissa deyir.

Ayova ştatındakı Su-Siti şəhərindəki xəstəxananın həkimləri Melissanın anasını hamiləliyin 31-ci həftəsində abort etmişdilər.

Melissadja sarılıq, respirator pozuntusu və qıcolmalar vardı. Həkimlər düşünürdülər ki, qız sağ qalsa belə, onun görmə və eşitmə qabiliyyətində problemlər olacaq, uşaq inkişafdan qalacaq.

3 həftə sonra Melissanı Ayova Sitidəki hospitala keçiriblər. Burada çalışan Meri adlı tibb bacısı uşağa Keti Rouz adını verib

Melissa 3 aylıq olanda onu Ron və Linda Odenlər övladlığa götürüblər. Odenlər 3 il əvvəl Temmi adlı qızı da övladlığa götürmüşdülər.
Uzun illər boyu Odenlərlə tibb bacısı Meri əlaqədə olublar, yazışıblar, bir-birlərinə məktublar və fotolar yollayıblar. Melissa böyüyəndə Meri ilə ünsiyyət qurub.

5 yaşı olanda Melissa inkişafda yaşıdlarını geridə qoyub. O, tam sağlamdı.
Məktəbi başa vuran Melissa Cənubi Dakota Universitetinin politologiya fakultəsinə qəbul olub. Sən demə, Melissanın nənəsi həmin universitetdə professor işləyirmişdi.

19 yaşından başlayaraq Melissa əsl valideynlərini aramağa başlayıb. İllər boyu qəzetləri, telefon məlumat kitabçalarını ələk-vələk edən, qəzetlərdə elanlar verən qızın axtarışları nəticə verməyib.

Yalnız Melissanın 36 yaşı olanda o, anasını tapıb. Bəlli olub ki, Melissanın nənəsi vəfat edib, onun özünün də iki bacısı var.
İki övlad anası Melissa yaşamı barədə kitab yazıb.

Maraqlıdır ki, Melissa övladlarını bir zamanlar abortda sağ qaldığı xəstəxanada dünyaya gətirib.
:milli.az