Sosial şəbəkələrdə pul yığanlar kimə inanmaq olar? (ŞƏRH)

Son vaxtlar sosial şəbəkələrdə xəstə olduğu deyilən insanların fotolarını paylaşaraq pul yığmaq üçün başladılan kampaniyaların sayı sürətlə artır.

BAKU.WS-in məlumatına görə, onlardan bəziləri övladlarının, bəziləri valideynlərinin, bəziləri isə yaxın dostunun ağır xəstə olduğunu və müalicə edilməsi üçün xeyli miqdarda vəsaitə ehtiyac olduğunu bildirirlər.

Sosial şəbəkələrdə paylaşılan fotoların altında bankda hesab nömrəsi, hətta “1 manat deyib keçmə, sən də kömək elə” kimi ifadələr qeyd edilir.
İnsanların hissləri ilə oynayaraq bu yolla pul qazanmaq istəyən dələduzlar çox vaxt qeyd edirlər ki, köməyə ehtiyacı olan şəxs leykoz xəstəliyindən əziyyət çəkir. Türkiyədə müalicəsi üçün 50, 100, 200 min pul lazımdır.

Xeyirsevər insanlar da buna aldanaraq qeyd edilən bank hesabına pul köçürürlər.

Halbuki həmin pula həqiqətən müalicə ilə şəfa tapa biləcək xəstələrin daha çox ehtiyacı var.

Bəs, sosial şəbəkələrdə başladılan yardım kampaniyalarının həqiqət olub-olmadığını necə müəyyən etmək olar? Xeyirsevər insanlar əslində köməyə ehtiyacı olanlara necə yardım edə bilərlər?


Sosioloq Əhməd Qəşəmoğlu BAKU.WS-ə açıqlamasında bildirdi ki, Sosial şəbəkələrdə bu cür kampaniyaların qarşısı alınmalı və elə qanuni baza yaradılmalıdır ki, insanlar xeyriyyəçiliyi etimad edərək açıq şəkildə həyata keçirə bilsin.

“Çox təəssüf ki, cəmiyyətimiz elə vəziyyətdədir ki, xeyriyyə mədəniyyəti arzuolunmaz səviyyəyə düşüb. Bu ənənələr də məhv olmağa doğru gedir. Ona görə ki, yalançı insanlar hisslərdən istifadə edirlər. Çalışmaq lazımdır ki, sosial şəbəkələrdə pul yığımaq dayandırılsın. Ona görə ki, fırıldaq adamların sayı çoxalıb. Cəmiyyətdə xeyriyəçiliyin sağlam əsaslar, prinsiplər üzərində inkişafı barədə ciddi düşünülməlidir. Qeyri Hökumət Təşkilatları maarifləndirmə işləri apara bilər. Milli Məclisin gündəminə çıxarılaraq müzakirə olunmalıdır”, - deyə sosioloq bildirdi.

Əhməd Qəşəmoğlu yardımsevər insanlara da çağırış edib:

“Korkoranə yardımın qarşısı alınmalıdır. Sosial şəbəkələrdə yayılan məlumatları insanlar dəqiqləşdirməlidir. Elanı görən kimi hisslərə qapılıb qeyd edilən bank hesabına pul yüklənməməlidir. Belə olan halda həqiqətən ehtiyacı olanlara da mane oluruq. Şəxsi olaraq aydınlaşdıra bilmiriksə, aidiyyatı QHT-lər bu cür elanları görüb araşdıra bilər. Bu mənada xeyriyyə təşkilatları önə çıxmalıdır. Ona görə də bu məsələ qanunvericiliklə tənzimlənməlidir”.