Mynews.az oxu.az-a istinadən xəbər verir ki, bu barədə “RİA Novosti”yə müsahibəsində Azərbaycan müdafiə naziri Zakir Həsənov deyib.
“Əlbəttə ki, bu barədə mənə məruzə etdilər. Saat təxminən 10-11 arası idi. Ermənilərin atəş nöqtələri yüksəkliklərdə yerləşdiyi üçün onlar bütün kəndi və ətraf ərazini görürdülər. Mən düşmənin uzaqlaşdırılaraq geri atılması üçün tədbir görülməsinə göstəriş verdim. Biz irimiqyaslı müharibəyə başlamaq niyyətində deyildik.
Azərbaycan ordusunun təxminən 15-20 faizi əməliyyatlara cəlb olunmuşdu. Mən hətta ehtiyat və artilleriya qüvvələrini cəbhə xəttinə çəkmədim. Ordu qarşıya qoyulan tapşırığı yerinə yetirdi. Ermənistan buna elə reaksiya verdi ki, sanki müharibə başlayıb. Onlar silahlarını ataraq qaçdılar. Yerevandan əlavə qüvvələr cəlb olundu. Üç gün onlar bizim mövqeyimizi atəşə tutdular. Baxmayaraq ki, artıq ikinci gündən özləri Rusiyanın müvafiq strukturlarına vasitəçiliklə bağlı müraciət etmişdilər.
Misal üçün, mənə Rusiya müdafiə naziri Sergey Şoyqu zəng vurmuşdu. O, “bu işi dayandırmaq lazımdır ” demişdi. Həmçinin Rusiya Baş Qərargahının rəisi Valeri Qerasimov da mənimlə əlaqə saxlamışdı.
Sonradan məlum oldu ki, erməni tərəfi vaxt udaraq bizə zərbə endirmək istəyir. Lakin bu da onlarda alınmadı. Biz qarşıya qoyulan hədəfə çatdıq - iki strateji yüksəkliyi azad etdik. Onların bizim üçün mühüm əhəmiyyəti var. Bu Lələtəpə və Talış yüksəklikləridir.
Qeyd edim ki, son vaxtlar təmas xəttində gərginlik yenidən artıb. Bunun bir səbəbi var - Azərbaycan torpaqlarını işğalı. Digər səbəblər - bunun nəticəsidir.
Əlbəttə ki, iki ordu üzbəüz dayananda toqquşmalar baş verir. Bu normal haldır. Lakin mülki vətəndaşların məqsədyönlü şəkildə atəşə tutulması - cinayətdir”, - nazir deyib.
