Hərbi vəziyyət haqqında qanun qəbul edildi

Siyasət

17:52 14.02.2017

Azərbaycan Milli Məclisi "Hərbi vəziyyət haqqında" qanun layihəsini ikinci və üçüncü oxunuşda qəbul edib.

Report-un xəbərinə görə, layihə parlamentin bu gün keçirilən plenar iclasında müzakirəyə çıxarılıb.

Qanun layihəsi 5 fəsil 27 maddədən ibarətdir.

Yeni hazırlanan qanun Azərbaycanın bütün ərazisində və ya ayrı-ayrı yerlərində hərbi vəziyyətin elan və ləğv edilməsi, hərbi vəziyyətin qüvvədə olma müddətinin uzadılması, hərbi vəziyyət rejiminin təmin edilməsi qaydasını, cəbhəboyu zonada hərbi hissələrin yerləşdiyi ərazilərdə rejimin xüsusiyyətlərini, hərbi vəziyyət şəraitində fiziki və hüquqi şəxslərin hüquqlarının təminatını müəyyən edir.

Hərbi vəziyyətin elan edilməsinin əsas məqsədi mülkiyyət və təşkilati-hüquqi formasından asılı olmayaraq bütün idarə, müəssisə və təşkilatların üzərinə düşən vəzifələri yerinə yetirmək üçün zəruri şəraitin yaradılmasıdır.

Layihə ikinci və üçüncü oxunuşda səsverməyə çıxarılaraq qəbul edilib.