İŞİD-dən xilas edilənlər arasında başqa azərbaycanlı uşaqlar da ola bilər - RƏSMİ

“Bağdaddakı azərbaycanlı uşaqların ölkəmizə göndərilməsi üçün İraq hökumətinin qərarını gözləyirik”.

Mynews.az APA-ya istinadən xəbər verir ki, bunu Azərbaycanın İraqdakı müvəqqəti işlər vəkili Ramiz Qafarov deyib. 

R. Qafarov bildirib ki, hazırda bu istiqamətdə əlaqədar qurumlarla işlər aparılır və siyasi qərar verilməlidir: “İŞİD-dən xilas edilən uşaqlar və valideynləri ilə bağlı rəsmi yazışmalarımızı davam etdiririk. İraq hökumətinin onların Azərbaycana göndərilməsi ilə bağlı müsbət qərarı olmalıdır. Buradakı qurumlar da bu işdə bizə köməklik göstərməyə çalışır”.

R. Qafarov deyib ki, Bağdadda tapılan uşaqların sırasında azərbaycanlı olduğu təxmin edilən digər kimsəsiz uşaqların da Azərbaycana qaytarılması üçün işlər görülür: “Tək Abdulla yox, azərbaycanlı olduğu güman edilən başqa kimsəsiz uşaqlar da var ki, onların da bizə təhvil verilməsi, Azərbaycana göndərilməsi üçün işlər aparırıq. Bununla bağlı İraq hökumətinə rəsmi müraciət etmişik”. 

Bağdad sığınacağına yerləşdirilmiş 3 yaşlı Abdulla və onunla yanaşı, digər azərbaycanlı uşaqlar Suriyada İŞİD-in işğalından azad edilən ərazilərdə tapılıb. Abdulla valideynlərinin öldüyünü bildirib.

Həmin azyaşlının Azərbaycanda babası və digər qohumları olduğu müəyyənləşib.

Azərbaycanın İraqdakı səfirliyi İraqda bu kimi vəziyyətlə üzləşmiş digər soydaşlarımızın da məsələsini diqqətdə saxlayır, zəruri konsulluq dəstəyi göstərir və bu xüsusda İraqın müvafiq dövlət qurumları ilə təmasları davam etdirir.