“Ukraynada gürcü millətinin dövlət başçısı vəzifəsini tutmasına icazə verilməyəcək”.
Mynews.az-ın məlumatına görə, bu barədə Oxu.Az-a politoloq, "Atlas" Araşdırmalar Mərkəzinin rəhbəriElxan Şahinoğlu Ukraynanın siyasi meydanında baş verən son hadisələri şərh edərkən bildirib.
“ABŞ-da Odessanın sabiq qubernatoruna rəğbət bəsləyənlərin olmasına baxmayaraq, düşünmürəm ki, hansısa böyük mərkəzlər Petro Poroşenkonu devirmək üçün Mixeil Saakaşvilini qiyama hazırlayırlar. Avropa və ABŞ daha çox Poroşenkoya dəstək verir. Belə ki, Poroşenko Rusiya ilə üz-üzə mübarizə aparır, Saakaşvili isə, əksinə, Rusiya ilə mübarizədə Poroşenkoya problem yaradır. Ona görə də ABŞ və Avropanın dövlət qurumlarının Saakaşvilini dəstəkləyəcəkləri inanılmazdır
Bəli, son hadisələr fonunda Saakaşvilinin reytinqi bir az qalxmışdı. Lakin dünən Kiyevdə baş verən proseslər və Oktyabr sarayının ələ keçirilməsi Odessanın sabiq qubernatorunun reytinqinə mənfi təsir etdi və əksinə, indi danışıqlara meyllilik nümayiş etdirir.
Son zamanlar Ukraynadakı hadisələrin Saakaşvili ilə Poroşenko arasında əvvəlcədən razılaşdırılmış ssenari üzrə baş verməsi ətrafında müzakirələr gedir. Bu proseslərin məhz Ukrayna prezidentinin reytinqini qaldırmasına xidmət etdiyi bildirilir. Lakin mən inanmıram ki, Saakaşvili və Poroşenko eyni oyunun tərkib hissələridir. Onlar bir-birinə rəqibdirlər. İstənilən halda, Ukraynada gürcü millətinin dövlət başçısı olması mümkün deyil. Hələ onun partiyasının parlamentə düşüb-düşməyəcəyi də məlum deyil, - deyə politoloq bildirib.
Qeyd edək ki, Ukrayna KİV-də Odessa vilayətinin keçmiş qubernatoru Mixeil Saakaşvilinin Ukrayna prezidenti Petr Poroşenkoya barışıq məktubu göndərməsi haqqında məlumat yayılıb. Saakaşvili bu xəbərləri təkzib edib.
Xatırladaq ki, dünən Kiyevin mərkəzində Mixeil Saakaşvili tərəfdarlarının yürüşü başlanıb. M. Saakaşvili həyat yoldaşı və oğlu ilə birlikdə aksiyada iştirak edib.
Daha sonra Saakaşvilinin tərəfdarları Kiyevin mərkəzində yerləşən Oktyabr sarayına hücum çəkib.
