Müdafiə Nazirliyində hərbi verilişlər hazırlayan müxtəlif televiziyaların əməkdaşları ilə görüş keçirilib.
Mynews.az-ın Müdafiə Nazirliyinin mətbuat xidmətinə istinadən verdiyi xəbərə görə, Müdafiə nazirinin şəxsi heyət üzrə müavini - Şəxsi Heyət Baş İdarəsinin rəisi general-leytenant Kərim Vəliyev jurnalistləri Müdafiə naziri adından salamlayaraq Azərbaycan Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi ilə son illər ərzində orduda həyata keçirilən islahatlardan, ölkənin hərbi qüdrətinin daha da möhkəmləndirilməsi sahəsində görülən işlərdən danışıb. Ölkə rəhbərliyinin diqqət və qayğısı sayəsində ordu quruculuğunun inkişaf etdirilməsi istiqamətində önəmli tədbirlərin həyata keçirildiyini bildirən nazir müavini qeyd edib ki, media nümayəndələri də bu işləri daim işıqlandırmaq üçün bütün imkanlarını səfərbər etməlidirlər. Tədbirdə çıxış edənlər hərbi vətənpərvərlik mövzularının kifayət qədər səmərəli şəkildə təbliğ edilməsi, həmçinin ordu quruculuğunda görülən işlərin, həyata keçirilən döyüş hazırlığı tədbirlərinin cəmiyyətə çatdırılması ilə bağlı öz fikirlərini bölüşüblər. Müxtəlif televiziyaları təmsil edən yaradıcı heyət nümayəndələri də belə görüşlərin qarşılıqlı əməkdaşlıq üçün vacib olduğunu bildirərək faydalı iş birliyinə görə Müdafiə Nazirliyinin rəhbərliyinə minnətdarlıqlarını bildiriblər.
