Hüseyn Abdullayevin onunla gizli iş birliyində olanları “baqaja qoyduğu” haqda məlumatlar var; keçmiş kriminal dəstə başçısının müstəntiqləri şoka saldığı deyilir
Sabiq deputat Hüseyn Adbullayevin vəkili mətbuatdan qaçır. O, müvəkkilinin harada saxlanması, onun səhhəti, saxlama şəraiti haqda məlumat vermək istəmir. Heç Hüseyn Abdullayevin ittihamlarla razılaşıb-razılaşmaması haqda da danışmağı özünə rəva bilmir. Əslində “Quska” ləqəbli eks deputatın vəkilinin belə bir tövr sərgiləməsi gözləniləndir. Belə görünür ki, vəkil müvəkkilinin mövqeyini ifadə edir, çıxıb nəsə danışmır.
11 il əvvəl də belə idi. Hüseyn Abdullayev Milli Məclisin iclas zalında deputat həmkarı Fəzail Ağamalı ilə dalaşdıqdan sonra əksəriyyət birincinin haqlı olduğunu düşünür, onun mövqeyini ifadə edən vəkilin açıqlamalarına böyük diqqət göstərirdilər. Amma vəkil danışmırdı. “Quska” az sonra onu keyfiyyətli şəkildə müdafiə edən vəkilin xidmətlərindən imtina edib “paykovoy” vəkillə müqavilə bağladı. Az sonra isə azadlığa çıxdı. Hazırda da belə xəbərlər dolaşmaqdadır ki, Hüseyn Abdullayev əvvəlki həbsi zamanı atdığı addımları təkrar etməklə azadlığa çıxmağa can atır. Həbsdə olub azadlığa can atmayan məhbus yoxdur. Hüseyn Abdullayevin də belə istəyinin olması təbiddir. Onu digərilərindən fərqləndirən vaxtilə kriminal qruplaşmaya rəhbərlik etməklə böyük gəlir gətirən iqtisadi sahələrə əl qoymasıdır. Kriminal-biznesmen keçmişli biri 2005-ci ildə qəfil deputata çevrildi və 2 il sonra parlamentdə məlum olay baş verdi.
Zaman göstərir ki, dəyişən illərdir, Hüseyn Adbullayev isə dəyişmir. İndi də xəbərlər yayılır ki. həmin dövrdə həbsə düşəndə özünü necə aparırdısa, indi də fərqli heç nə etmir.
Bəzi məlumatlarda deyilir ki, H.Abdullayev artıq istintaqla əməkdaşlığa başlayıb. Mənbənin iddiasına görə, o, istintaqa elə adlar çəkib ki, təcrübəli istintaqçılar belə təəccüblərini gizlətmirlər.
Hüseyn Abdullayev təhlükəsiz zamanların qəhrəmanı olsa da, ayağı büdrəyəndə ordunun axsaq əsgərinə çevrilib. Hər halda belə məlumatlar, iddialar dolaşmaqdadır…
Yada salaq ki, Türkiyədə həbs olunaraq Azərbaycana gətirilən sabiq deputat Hüseyn Abdullayevin cinayət işi üzrə istintaq davam edir. Ona ümumilikdə 1 milyon 810 min manat məbləğində vergiləri dövlət büdcəsinə ödəməkdən yayındırmaqda və xüsusi razılıq (lisenziya) tələb olunduğu halda belə, razılıq almadan tikinti-quraşdırma işlərini həyata keçirərək 966 min manat məbləğində gəlir əldə etməsinə əsaslı şübhələr olduğundan H.Abdullayevə qarşı Cinayət Məcəlləsinin 192.2.2 (qanunsuz sahibkarlıq) və 213.2.2-ci maddələri ilə yenidən ittiham elan edilib.
Onu həbsindən dərhal sonra yayılan məlumatlarda da deyilirdi ki, bu ittihamlarla 12 il azadlıqdan məhrum edilməsini gözə alan H.Abdullayevin artıq istintaqla əməkdaşlığa razılaşıb. Onun həbsdə çox qalmamaq üçün hər şeyə hazır olduğu deyilirdi. Qeyd olunurdu ki, Avropadakı şıltaq hakimiyyət tənqidçilərinin Azərbaycandakı “kurator”ları barədə bildiklərini danışmağa razılaşıb… (Musavat)
