Həmyerlimiz Başqırdıstan Respublikası Baş nazirin müavini təyin edilib

Siyasət

14:23 25.01.2017

Həmyerlimiz Fərhad Səmədov Rusiya Federasiyasının Başqırdıstan Respublikası Prezidentinin Fərmanı ilə Baş nazirin müavini təyin olunub. Soydaşımız Başqırdıstan Respublikasında sənaye, innovasiya prosesləri, informasiya texnologiyaları sahəsinə nəzarət edəcək.

Mynews.az-ın  məlumatına görə Bu barədə Diasporla İş üzrə Dövlət Komitəsinin mətbuat xidmətindən AZƏRTAC-a məlumat verilib.

Qeyd edək ki, Fərhad Səmədov 1959-cu ildə Gürcüstanın Qardabani şəhərində anadan olub. Moskvada Mühəndis-İnşaat İnstitutunu bitirib. Texnika elmləri namizədidir. Əmək fəaliyyətinə 1982-cı ildə Azərbaycanda başlayıb, mühəndis və böyük mühəndis vəzifələrində çalışıb.

1994-1998-ci illərdə “Eksimer” elm-istehsalat müəssisəsinin baş direktorunun müavini olub. 2000-ci illərin əvvəllərindən başlayaraq 2009-cu ilə qədər Başqırdıstanın iri müəssisələri olan “Kaustik” QSC-yə, “Soda” ASC-yə rəhbərlik edib.

Rusiya Federasiyasının fəxri kimyaçısı olan Fərhad Səmədov Baş nazirin müavini təyin edilənə qədər “Birləşmiş neftkimya şirkəti”nin prezidenti olub.