Türkiyə müxalifətin hücum planını 6 ay əvvəldən bilib - Reuters

Siyasət

17:54 09.12.2024

Bir gün əvvəl Dəməşqdə hakimiyyəti ələ keçirən silahlı Suriya müxalifəti altı ay əvvəl Türkiyə tərəfini Suriyanın rəsmi hakimiyyətinə qarşı genişmiqyaslı hücuma başlamaq niyyəti barədə məlumatlandırmışdı. Bu barədə “Reuters” məlumat yayıb.

“Suriya müxalif qrupları... təxminən altı ay əvvəl Türkiyəni böyük hücum planları barədə məlumatlandırıblar və onun gizli razılığını aldıqlarına inanırdılar”, xəbər agentliyinin materialında deyilir.

Eyni zamanda, Birləşmiş Ştatlar bəyan edib ki, Vaşinqton Ankaranın silahlı Suriya müxalifətinin Ərəb Respublikasının şimalında yerləşən Hələb vilayətinə hücum planlarını “sakit şəkildə təsdiqləməsi”ndən xəbərsizdir.

Suriya yaraqlılarının hücumu ötən həftənin ortalarında, noyabrın 27-də İdlib və Hələb əyalətlərində başlayıb. Dekabrın 8-də səhər saatlarında hökumət əleyhinə olan qoşunlar Suriyanın paytaxtı Dəməşqə daxil olub, bundan sonra prezident Bəşər Əsəd rejiminin süqutunu elan ediblər. O, istefa verdi və ölkəni tərk edərək Rusiyaya getdi və orada sığınacaq aldı. Suriyanın baş naziri Məhəmməd Qazi əl-Cəlali islamçılarla danışıqlar apardığını və hakimiyyətin dinc yolla ötürülməsini təşkil etmək niyyətini açıqlayıb.