Fəaliyyətini dayandırmış ANS telekalında yayımlanan “Uşaqdan böyüyə” verilişinin aparıcısı İrəm Nəbiyeva (əsl adı İlahə) boşanma mərhələsindədir.
Aparıcının 3 il öncə ailə həyatı qurduğu türk vətəndaşı Cenk Kocaer PrimeTime.Az-a müraciət edib.
O, iddia edib ki, bir ildir, İrəmdən boşanmaq istəyir, lakin aparıcı onu məhkəmə salonlarında süründürür: “Boşanmanın əsas səbəbi həddindən artıq qısqanc olmasıdır. Bir məsələ ilə bağlı məni səhv başa düşmüşdü və iş yerimə zəng etmişdi. Onun bu hərəkətinə görə mən işimi itirdim. Polisəm, amma hazırda sürgünə göndərilmişəm. Buna görə də ayrılmağa qərar verdim. Məni bu vəziyyətə salan biri ilə yaşamaq istəmirəm”.
C.Kocaer İrem Nəbiyevanın boşanmaq üçün ondan pul tələb etdiyini bildirib:
“Məndən ayrılmaq üçün 10 min dollar pul tələb etdi. İstədiyi məbləği ona verdim. Hətta vəkili üçün tələb olunan 5 min TL (2500 azn) məbləğində vəsaiti də mən ödəmişəm. Amma məhkəmə günü məndən boşanmaq istəmədiyini dedi. Halbuki onunla protokol imzalamışdıq. İmzalanan razılaşmanı pozsa da qeyd etdiyim məbləği ondan geri almadım”.
Bir ildir evliliklərinin kağız üzərində davam etdiyini deyən Cenk ötən həftə baş tutan məhkəmə prosesinə İrəm Nəbiyevanın qatılmadığını söyləyib:
“İrəm boşanmaqdan imtina etdikdən sonra məhkəmə tarixini yenilədik. Ötən həftə baş tutan prosesə isə qatılmadı. Eşitdiyimə görə, “Hələ də türk vətəndaşı ilə evliyəm, orada evim var, Cenk həyat yoldaşımdır”, - deyir. Mənim onunla bir ildir ki, heç bir əlaqəm yoxdur. Sadəcə anlamadığım bir şey var. Bir ildir ki, boşanmaqdan imtina edir. Sevilmədiyini bilə-bilə niyə hələ də evliliyi davam etdirmək istəyir? Amma nə olsa da onunla rəsmən ayrılmaq fikrindən dönməyəcəyəm”.
Məsələyə aydınlıq gətirmək üçün İ.Nəbiyeva ilə əlaqə saxladıq. Xəbəri təkzib etməyən aparıcı buna belə aydınlıq gətirdi: "Sizə uşaqların sevimlisi İrəm vacibdir yoxsa hansısa xarici ölkə vətəndaşı? Mənim haqda bu günə kimi nə isə neqativ xəbər eşitmisiniz? Hansısa şərəfsizin dediyinə inanmayın. Bu dəqiqə xəstəxanayadayam. Anam xərçənglə mübarizə aparır. Əgər çıxan yazılara görə anamın səhhəti ağırlaşsa və ya dünyasını dəyişsə, sən buna görə cavab verə biləcəksən? Cenkə demişəm ki, səni süründürəcəyəm. Əlimdə o qədər dəlillər var. Vəkilim də hazırda bu işlə məşğul olur".
