Ayşvariya Ray Kannda gözəlliyi ilə hər kəsi kölgədə qoydu

Maqazin

21:18 21.05.2017

Hind aktrisası Ayşvariya Ray Kann festivalının növbəti günündə möhtəşəm çıxışı ilə hər kəsi kölgədə qoyub.

Publika.az xarici mətbuata istinadən xəbər verir ki, aktrisa Kann festivalının dördüncü günündə keçirilən “1 dəqiqədə 120 zərbə” filminin təqdimat mərasiminda iştirak edib. “Ralph & Russo” moda evindən qırmızı rəngli ziyafət libası geyinən hind gözəli gecənin əsas ulduzu olub.

Kino ulduzunun bədən quruluşunu vurğulayan paltarın fasonu, çoxqatlı büzmələri ehtiraslı flamenko rəqqasəni xatırladıb. Stilistlər aktrisanın saçlarına iri dalğalar atıb, dodoqları üçün bir neçə il əvvəl olduqca trend olan zoğalı rəngli pomada üzərində dayanıblar. Məşhurun baxışlarını daha ifadəli göstərmək üçün əlavə kirpiklər taxılıb, qara laynerlə incə oxlar çəkilib, almacıq sümüklərində isə şaftalı ənlikdən istifadə ediblər.

Xatırladaq ki, Ayşvariyanın iki gün əvvəlki çıxışı da böyük müzakirələrə səbəb olmuşdu. Onun “Michael Cinco” moda evindən seçdiyi mavi rəngli “Sinderella” donu festivalın ən yaxşılarına daxil edilib.