Bu gün müğənni Damlanın jurnalistlərlə görüşü baş tutub.
Yaradıcılığında dəyişikliklər etməyi sevdiyini deyən ifaçı payız aylarında Heydər Əliyev adına sarayda böyük solo koserti ilə çıxış edəcəyini bildirib.
Qısa zamanda Azərbaycanda böyük populyarlıq qazanan müğənni uğur qazanmasının sirrini belə izah edib: “Şansın burada böyük rolu var, lakin hər şeyi şansın üstünə yıxmaq olmaz. Yalnız bir sirri var: çalışmaq və dayanmadan çalışmaq. Sənətçi özü də əziyyət çəkməlidir, öz üzərində çalışmalıdır, güclü musiqi duyumu olmalıdır. Musiqini seçərkən tamaşaçıların zövqünü və təlabatını da mütləq şəkildə nəzərə alıram”.
Müğənni həmkarlarının onun mahnılarının müəyyən təbəqəyə aid olması, kənd camaatının musiqi zövqünə uyğun olması barədə dediklərinə də aydınlıq gətirib:
“Əgər mənim mahnılarıma qara camaat dedikləri zəhmətkeş insanlar, kənd xanımları qulaq asırsa, deməli, onların sevgisini qazanmışam. Qoy, onlar məni sevsin. Ümumiyyətlə, qara camaat sözünü sevmirəm. Bəzən deyirlər ki, Damla toylara ucuz qiymətə gedir. Toyunda oxumağımı arzulayan o qədər insanlar var ki… O insanlara qiymət oxuya bilmərəm. Çünki toy insan həyatında bir dəfə olur. Lakin məni elitar təbəqə sayılan insanlar da öz məclislərinə dəvət edirlər. Ali təbəqə məni dinləmirsə, niyə onların qohumlarının və övladlarının toyunda Damla iştirak edir? Başqa bir reallıq da var ki, həmin sənətçilərlə eyni məclisdə eyni səhnəni paylaşıram. Yaradıcılığımı qəbul etməyən sənət dostlarıma nə deyə bilərəm ki? Onlara sadəcə bu sənətdə qazandığım uğurun eynisini arzu edə bilərəm. Hətta daha artıq nailiyyətlər qazansınlar. Rəqib sözünü sevmirəm, bizim başlıca vəzifəmiz sənətlə məşğul olmaqdır. Rəqim güləş meydançasında olur. Və müğənnilik fəaliyyətimə başladığım dövrdən bəri heç vaxt heç kimə sataşmamışam, qalmaqallardan uzaq olmuşam. İfaçı öz səsi, danışıq tərzi, nitq qabiliyyəti, intellekutalı və mahnıları ilə örnək olmalıdır”.
Daha çox lirik mahnıları ilə insanların sevgisini qazanan Damla fərqli janrlara da müraciət edəcəyini bildirib: “Fərqli janrlarda da mahnılar oxumağı planlaşdırıram. Xüsusilə rok mahnılarını çox sevirəm və bu janrda mahnı oxumağı düşünürəm. Mənim toy mahnıları oxuduğumu deyirlər. Amma efirə çıxanda heç vaxt toy mahnıları ifa etmirəm. Bizim kanallarımızda isə səhərdən-axşama qədər toy mahnılarını səsləndirilir”.
“Sevgisiz həyat olmaz” deyən ifaçı şəxsi həyatından danışıb: “Sevgi olmasa, insan yaşaya bilməz. Hər kəsin qəlbinin dərinliklərində gizlətdiyi sevgi dünyası ola bilər. Bu sevgi dünyası məndə də var. Şükürlər olsun ki, çox xoşbəxt qadınam. Sevgim qarşılıqlıdır. Allah qismət eləsə, ailə quracam. Toyu, evliliyi bəyan edərlər. Bunu niyə gizlətməliyəm ki? Qanuni nikahla ailə qururamsa, gələcək övladım atasının soyadını daşıyarsa, bunu niyə gizlədim?”
İşlərinizin çoxluğundan sevdiyiniz adama vaxt ayıra bilirsinizmi” sualına müğənni: “İşimi atıb kiminsə dalınca qaçmaram. İşim mənim üçün çox önəmlidir və hər şeydən üstündür”, – deyə cavab verib.
