Beş gündür aclıq elan edən modelyer tanınmaz hala düşüb.
Mynews.az a24.az-a istinadən xəbər verir ki, bu ayın 18-dən aclıq aksiyasına başlayan tanınmış modelyer Leyla Əhmədovanın yeni görüntüləri yayılıb. Yayılmış videodan L.Əhmədovanın sağlıq vəziyyətinin heç də yaxşı olmadığı aydın görünür. İsrarlara baxmayaraq modelyer aclıq aksiyasını dayandırmır.
Xatırladaq ki, bir neçə gün öncə modelyer Leyla Əhmədova çalışdığı məkanın əlindən alınmaq istənildiyi üçün aclıq elan etdiyini bildirmişdi. Həyatının təhlükədə olduğunu qeyd edən modelyer bildirmişdi ki, icarəyə götürdüyü məkana 1 milyon manat vəsait xərcləyib, ancaq 3 aydan sonra yer sahibləri ondan məkanı boşaltmasını tələb edib.
Çarəsiz qalan modelyer aclıq aksiyası keçirərək çalışdığı məkan uğrunda mübarizə aparsa da, qarşı tərəf geri addım atmır.
Qeyd edək ki, modelyer aclıq aksiyasına başlamazdan əvvəl bunları demişdi:
"Bu gündən haqqımı axtaracağam. Ona görə də aclıq elan edirəm. Mənim babam vətən yolunda canından keçib. Damarlarımda onun qanı axır. Bu səbəbdən də düşünürəm ki, bu aksiyanı edərək səsimi eşitdirə bilərəm. Əgər olmazsa, ən azından ömrümün sonu gələr və uçuruma düşməyimi görmərəm. Ona görə də media nümayəndələrinə səslənirəm. Sizin dəstəyinizi hər zaman hiss etmişəm. Mənə mesaj göndərirlər ki, həyatın təhlükə altındadır. Məkandan çıxmalısan. Sonuncu dəfə deyib ki, məni nəzarət altında saxlayır. Məni kim izləyir? Arxamca kim gəlir? Mənim övladlarım var. Çox qorxuram”.
