Məhkəməyə gəlməyən Aygün yaşayış yerini dəyişib

Maqazin

15:03 19.02.2018

Səbail Rayon Məhkəməsində əməkdar artist Röya Ayxanın həmkarı, əməkdar artist Aygün Bəylərə qarşı iddiası əsasında məhkəmənin hazırlıq iclası davam etdirilib.

Mynews.az xəbər verir ki, bu barədə "Report"a R.Ayxanın vəkili Vamiq Şükürov məlumat verib.

Onun sözlərinə görə, hakim Zaur Əliyevin sədrliyi ilə keçirilən prosesdə A.Bəylərin məhkəməyə gəlmədiyi elan olunub.

Hakim bildirib ki, A.Bəylərin özünün də məhkəmədə iştirak etməsi lazımdır: "Məhkəmə onun ünvanına bildiriş göndərib. Amma Aygün xanım deyəsən həmin ünvanda yaşamır. Məhkəmə onun ünvanına yenidən bildiriş göndərəcək".

Məhkəmənin növbəti iclası fevralın 26-na təyin edilib.

Qeyd edək ki, R.Ayxan iddia ərizisində yazıb ki, A.Bəylər ARB televiziyasına müsahibəsində onun şərəf və ləyaqətini təhqir edib. Buna görə də R.Ayxan iddia ərizəsi ilə Səbail Rayon Məhkəməsinə müraciət edərək müğənni həmkarını məhkəməyə verib. O, həmkarından mənəvi ziyana görə 50 min manat təzminat və mətbuat vasitəsilə səsləndirdiyi fikrilərin yalan olması barədə açıqlama verməsini tələb edir.

Xatırladaq ki, A.Bəylər ARB televiziyasının "Səhər-səhər" verilişində R.Ayxanın sənəti ilə bağlı sərt ifadələr səsləndirib.