İmtahanlar yeni formatda keçiriləcək - DETALLAR

Elm

23:51 17.01.2025

Dövlət İmtahan Mərkəzinin (DİM) İdarə Heyətinin sədri Məleykə Abbaszadə bildirib ki, bu ildən etibarən gələcəkdə imtahanların bir qisminin rəqəmsal şəkildə həyata keçirilməsi üçün addımlar atılacaq.

Bəs imtahanların rəqəmsallaşdırılması dedikdə nə nəzərdə tutulur?

Təhsil eksperti Adil Vəliyev  açıqlamasında deyib ki, buraxılış və qəbul imtahanlarının rəqəmsal formatda olması abituriyentlərin imtahandan sonra nəticələrini birbaşa öyrənmələrinə imkan yaradır:

“Necə ki, müəllimlər sertifikasiya imtahanında iştirak etdikdən sonra artıq nəticəni bilirlər və bu nəticəyə uyğun olaraq qərarlarını verirlər, eynilə də abituriyentlər də buraxılış imtahanı və qəbulun birinci imtahanında iştirak edəndən sonra test tipli sualların cavablarını biləcəklər. Bundan sonra onlar qərar verəcəklər ki, növbəti imtahana daha tez hazırlaşsınlar və yaxud universitet sistemi, ixtisaslar haqqında düşünsünlər. Bu format açıq tipli tapşırıqların cavablarının açıqlanma vaxtını da xeyli azaldacaq”.

Ekspert qeyd edib ki, inkişaf etmiş ölkələrin hamısının təhsil sistemində elektron formata keçid başlanılıb və bizim də bunu həyata keçirməyimiz təhsilin inkişafına dəstək verəcək.