Qərb Ukrayna və Krımla əlaqədar Rusiyaya təsir ölçüləri bəhanəsi altında Şimal qonşumuzun sərhədlərinin perimetri üzrə “zəhərli bufer” qurmağa başlayır. Amma onların həqiqi hədəfi rus məsələsinin qəti həllidir.
Mynews.az Publika.az-a istinadən xəbər verir ki, bu iddia postnovosty.ru saytında Vadim Bondarın imzası ilə dərc olunan yazıda səsləndirilib.
Müəllif qeyd edir ki, 2015-ci ilin martında ABŞ Mərkəzi Kəşfiyyat İdarəsinin (MKİ) “kölgəsi” hesab olunan “Strategic Forecasting” (“Stratfor” – “Strateji proqnozlaşdırma”) qlobal kəşfiyyat-analitik şirkəti özünün uzunmüddətli proqnoz xarakterli hesabatını dərc etdi: “Gələcək onilliyin dünyası: 2015-2025”. Hesabatda Rusiyanın taleyi və son aqibəti ilə bağlı proqnozlar yer almışdı.
“Və hazırda baş verən hər şey bu son nəticənin əldə edilməsinə yönəldilib. Aprelin 17-də məlum oldu ki, RAND Amerika tədqiqat mərkəzinin ekspertləri ABŞ Müdafiə Nazirliyini Rusiya tərəfindən təcavüzkar hərəkətlərin istənilən təzahürlərinə reaksiya göstərilməsinin bütün mümkün ssenarilərini saymağa çağırdılar. Bu haqda təşkilatın saytında dərc edilmiş xüsusi məruzədə deyilir. Sənəddə deyilir ki, Rusiyanın hərəkətləri ABŞ Müdafiə Nazirliyi tərəfindən qiymətləndirilməlidir. Xüsusi halda, analitiklər Pentaqona Kalininqrad hərbi dəniz bazasının neytrallaşdırılması ssenarilərini işləməyə, həmçinin bu halda Rusiya tərəfindən cavab hərəkətlərinin mümkün variantlarına baxmağa təklif edirdilər. Bundan başqa, ekspertlər Pentaqona Rusiyanın imkanlarını qiymətləndirməyi məsləhət gördülər”, – Vadim Bondar qeyd edib.
Aprelin ortalarında isə NATO və Avropa İttifaqının bir sıra ölkələri Rusiya tərəfindən “hibrid təhlükə”nin qarşısının alınması üzrə Avropa mərkəzinin qurulması haqqında razılaşdılar. Mərkəz ilin sonuna kimi tamamilə hazır olacaq. Mərkəzin qurulması haqqında memorandumu 9 ölkə – Finlandiya, İsveç, Latviya, Litva, Polşa, Fransa, Almaniya, Böyük Britaniya və ABŞ imzaladı. NATO və Avropa İttifaqının başqa üzv ölkələrinin yaxın gələcəkdə mərkəzə qoşulacağı gözlənilir.
“Hibrid təhlükələrin qarşısının alınması NATO üçün prioritet məsələdir. Çünki, onlar siyasi, diplomatik, iqtisadi və hərbi təcavüzü uyğunlaşdıraraq sülh və müharibə arasındakı sərhədləri yuyub aparırlar”, – sənəddə qeyd edilirdi.
Müəllif bildirir ki, Rusiyanın yaxın və uzaq sərhədləri boyu qurulan mərkəz və onun filialları Rusiyaya qarşı yönələcək.
Onun sözlərinə görə, Rusiya artıq bu təcrübəni yaşayıb: “1925-ci ildən başlayaraq Sovet Rusiyasının ətrafında “sanitar dəhliz” tikilirdi. Sərhəd qruplaşmaları güclənirdirilir və “bolşevik hakimiyyətinin devirilməsi” üçün mərkəzlər yaradılırdı. Bütün bunlar isə Qərbi Ukrayna və Qərbi Belarus, Bessarabiyanın bir hissəsi və fin ərazisi ilə bağlı Stalinin qərarlarına təsir etdi (1939-cu ilin avqustunda başlanan Molotov-Ribbentrop paktı ilə Almaniya əvvəllər Rusiya imperiyasına daxil olmuş Finlandiya, Latviya, Estoniya və Bessarabiya üzərində SSRİ-nin maraq dairəsini tanıdı. Tərəflər Polşanı bölüşdürmək barədə də razılığa gəldilər – red.). Və bu, nəticədə İkinci dünya müharibəsini yaxınlaşdırdı. Bu gün isə Rusiya ətrafında yerləşən bufer dövlətləri Rusiya və qərb “partnyorları” arasında yeni mübarizə meydanına çevrilir. Amerikalılar öz ərazisində hər hansı müharibəni (hibrid müharibəsi də daxil olmaqla) düşünmürlər. Onlar yalnız potensial rəqiblərinin sərhədlərində yerləşən yad dövlətlərin ərazilərində hər cür mərkəzlər və bazalar yaradır, sözügedən ölkələrin kontingentlərini və resurslarını bu işə cəlb edirlər”.
Müəllif Gürcüstanın müdafiə naziri Levan İzorianın aprelin 11-də parlamentdə illik məruzə ilə çıxışını xatırladıb. Nazir bildirib ki, bu il ölkədə ABŞ-la birgə döyüş hazırlığının mərkəzi tikiləcək. Mərkəz Almaniyanın Hohenfels şəhərində yerləşən Amerika hərbi bazasındakı mərkəzin analoqu olacaq.
“Bu, ABŞ-ın Avropa komandanlığı çərçivəsində Almaniya ərazisində yerləşən mərkəzin analoqudur. Bu, çox iddialı plandır”, – Levan İzoriya deyib.
Yazıda bildirilir ki, yalnız aprel ayında baş verən hadisələr Rusiya ətrafında Finlandiyadan Gürcüstana qədər qövs çəkildiyini göstərir: “NATO həm Rusiya sərhədlərinə hərbi infrastruktur və hərbi kontingentini yaxınlaşdırır, həm də yeni mərkəzlər tikir və hər cür “qeyri-adi” ssenariləri hazırlayır. Bütün bunlar əslində niyə hazırlanır? Axı ABŞ-da, NATO-da və Avropa İttifaqında ciddi olaraq düşünmürlər ki, Rusiya “Baltika cırtdanları”na hücum edəcək və bütün NATO-ya müharibə elan edəcək. Rusiya sərhədlərində ittifaq güclərinin genişləndiriilməsi və təbliğatçılıq mərkəzlərinin yaradılması nə üçün lazımdır? Bu suala “Stratfor”un proqnozunda cavab tapırıq. Onda birbaşa yazılıb: “Biz düşünmürük ki, Rusiya indiki şəkildə daha on il yaşamağa qadirdir”. “Düşünmürük” ifadəsini bu cür oxumaq lazımdır: “Hər şeyi edək ki, ən yaxın on ildə Rusiya özünün indiki mövcudluğunu dayandırsın. Bunun üçün isə bütün yuxarıda göstərilən addımlar atılır. Həmçinin, “sanitar dəhliz”də yerləşən ölkələrin də özlərinin kiçik olmayan maraqları var”.
“Stratfor”un proqnozunda daha sonra yazılıb: “Polşa, Macarıstan və Rumıniya nə vaxtsa rusla mübarizədə itirilmiş regionları qaytarmağa cəhd edəcək. Rusiya Şimali Qafqaza nəzarət etmək qabiliyyətini itirəcək, Mərkəzi Asiyada destabilizasiya başlanacaq. Şimali-qərbdə Kareliya Finlandiyanın tərkibinə qayıtmağa çalışacaq”.
“Onilliyin birinci yarısının məsələsi ərazi olacaq və yeni Baltik-Qara dəniz ittifaqına yayılacaq. Onu Azərbaycana və Xəzər dənizinə qədər genişləndirmək məntiqli olardı”, – “Stratfor” proqnozunun müəllifləri yazırlar.
