Yol polisləri artıq gizlənərək fəaliyyət göstərə bilməyəcək

Cəmiyyət

20:05 02.06.2017

“YPX əməkdaşı artıq gizli patrul xidmətləri göstərə bilməyəcək”.  

Mynews.az xəbər verir ki, ekspert Ərşad Hüseynov bu barədə "Facebook" hesabında yazıb. Ekspertin sözügedən məsələ ilə bağlı paylaşdığı postunu təqdim edirik:

"May ayının 12-də DİN-in Kollegiyası “Yol-patrul xidməti haqqında" yeni Təlimat təsdiq edib. Təlimatda xeyli yeniliklər var. Onların ən maraqlılarından biri xidmətin növləri ilə bağlıdır. Yəqin ki, Nazirlik yol-patrul xidmətində aşkarlığı yüksəltmək məqsədilə və müasir texniki vasitələrin geniş tətbiqini nəzərə alaraq bu xidmətin yalnız aşkar üsulla aparılmalı olduğunu təsbit edib. Başqa sözlə, yeni təlimatda gizli xidmət, hətta qarışıq (yəni yarı aşkar, yarı gizli) xidmət nəzərdə tutulmur. “Yol-patrul xidməti haqqında" yeni Təlimatda digər mühüm bir yenilik hərəkətdə olan nəqliyyat vasitəsinin DYP əməkdaşı tərəfindən saxlanılması halları ilə bağlıdır. Bundan sonra nəqliyyat vasitələri yalnız “Yol hərəkəti haqqında” Azərbaycan Respublikası Qanununun 85-ci maddəsində nəzərdə tutulan hallarda dayandırıla bilər. Bu isə o deməkdir ki, məsələn, hər hansı başqa səbəb yoxdursa, reyd keçirilməsi adı ilə avtomobili dayandırmaq artıq olmaz".