Lənkəranın Şürük kənd məscidinin axundu Cəsarət Hüseynov mollalıq adı altında baxıcılıq-cadugərlik edir. Məni də aldadaraq 400 manat pulumu alıb.
Mynews.az xəbər verir ki, bu fikirləri criminal.az saytına şikayət edən Lalə adlı oxucu deyib.
Bildirib ki, bir müddət əvvəl Vəsilə adlı xanımın vasitəsilə C.Hüseynovu tanıyıb və bəxtinin açılması üçün ona 400 manat pul verib: ''Lakin sonradan bunun fırıldaq olduğunu bildim. Əməliyyat olunduğumdan Cəsarətin nömrəsini itirdim. Xeyli müddət sonra Cəsarətin telefon nömrəsini taparaq zəng etdim. Mənə dedi ki, sənə 100 manat qaytarım, söhbəti bağlayaq. Mən razılaşmadım, hədə-qorxu gəlməyə başladı. Mənə deyir ki, bəxtini bağlayıb ataram dənizə ömürlük məhv olarsan. Ona biabır edəcəyini deyəndən sonra məni aldatmağa başladı. İki aydı məni fırladır''.
Cəsarət Hüseynov criminal.az saytına açıqlamasında şikayətçinin dediklərini tamamilə təkzib etdi. Bildirdi ki, polisə gedərək ona şər atılması barədə məlumat verəcək: ''Lalənin nömrəsi və şəkilləri məndə var. Sabah polisə gedib bildirəcəm ki, araşdırsınlar həmin qız mənə pul verib, ya yox... Onun mənimlə görüşməsi və ya pul verməsi barədə sənədi var? Bəlkə mənə şər atır. Ona dəfələrlə demişəm ki, mən sizi tanımıram. Deyir sənə pul vermişəm. Mən də deyirəm ki, şəklini göndər görüm səni tanıyıram. Mənə sübut etsin ki, pul verib. Almışamsa, şəxsiyyət vəsiqəsini göndərsin, pulu göndərim. O bilsin, Allah bilsin. Soğan yeməmişəm, içim niyə göynəsin? Həmin xanıma deyin mənə şəxsiyyət vəsiqəsini göndərsin, pulu göndərim ona poçt vasitəsilə... Pulu göndərəcəm, gözəgörünməz Allah bilsin''.
