Xırdalan şəhəri, Mehdi Hüseynzadə küçəsində yerləşən və 60-dan çox ailənin yaşadığı 39 saylı binada işıqlar söndürülüb.
Mynews.az Xezerxeber.az-a istinadən xəbər verir ki, buna səbəb binanın “Azərişıq” Açıq Səhmdar Cəmiyyətinə enerji borcunun yaranmasıdır.
“Kristal” M.V.U adlı inşaat şirkəti tərəfindən inşa olunan bina təhvil verilmədən sakinlər köçürülməyə başlanıb. Buna görə də həmin binaya elektrik bir sayğacdan paylanıb. Bu səbəbdən də sakinlər işıqpullunu hər ay binanın komendantına ödəyiblər. Buna baxmayaraq, binanın “Azərişığ”a borcu yaranıb. Nəticədə sakinlərin mənzilləri işıqsız qalıb.
Sakinlər bildirirlər ki, bina komendantı enerjinin itkiyə getdiyini, borcun da elə bu səbəbdən yarandığını deyir.
Çəkiliş ərəfəsində şirkətin icraçı direktoru Cəfər Aşurov və Etibar adlı daha bir məsul şəxs həmin ünvana gəldi. Ancaq çəkiliş olduğunu bildikdə suallarımıza cavab vermədən ərazidən uzaqlaşdılar. Binanın komendantı da məsələdən xəbərdar olub, ərazini tərk etdi.
Xırdalan Enerji Təchizatı və Satışı İdarəsinin rəisi Nemət Qasımov isə bildirdi ki, binanın enerji ödənişləri hər ay yarımçıq ödənilib. Borc da elə buna görə yaranıb. Yəni enerjinin itkiyə getməsi iddiası əssassızdır.
Nemət Qasımov həmçinin bildirdi ki, bina texniki şərtlərə tam cavab vermədiyi üçün mənzillərə ayrılıqda sayğac quraşdırılmayıb. Hazırda bu istiqamətdə danışıqlar gedir.
Mövzu ilə bağlı daha ətraflı videomaterialı təqdim edirik:
