Qurban bayramına bir həftədən az bir vaxt qala qurban kəsimi ilə bağlı yenidən bəzi suallar gündəmə gəlib. Bu yazıda həmin suallardan biri araşdırılıb:
Kredit borcu olanlar qurban kəsə bilərmi?
Mynews.az xəbər verir ki, Metbuat.az-a açıqlama verən ilahiyyatçı Hacı Fuad Pənahlı bildirir ki, İslam dini qurban kəsməyi Həcc ziyarətinə gedən zəvvarlar üçün vacib buyurur:
“Xalqımız dinə bağlı olduğu üçün Qurban bayramı günü qurban kəsir. Söz verilməyibsə, hər il qurban kəsmək vacib deyil. Amma kəsilirsə, bu, gözəl bir iş, ibadətdir. Kredit borcu olan şəxslərin qurban kəsib-kəsməməsinə gəlincə, borcu olan hər bir insan qurban kəsə bilər. Pul sahibi borclunu tələsdirmirsə, qurban almaq onun maddi vəziyyətinə ciddi təsir etmirsə, borclu şəxslər də qurban kəsə bilər. Amma qurban kəsmək üçün borcundan qalan, bununla bağlı yaşayışında problem yaranan şəxslərin qurban kəsməsi vacib deyil”.
