Sumqayıt Apellyasiya Məhkəməsində Şamaxı rayonu Pirbəhli kənd ümumtəhsil məktəbində 15 yaşlı şagirdini zorlamaqda ittiham edilən tarix müəllimi Elnur Həsənağa oğlu İbrahimovun şikayətinə baxılıb.
Cebhe.info xəbər verir ki, Apellyasiya Məhkəməsində Elnur İbrahimovun işi ilə bağlı növbəti proses martın 3-nə təyin olunub.
Şamaxı rayon Məhkəməsinin qərarına əsasən, Elnur İbrahimov 2 il 6 ay müddətinə pedoqoji fəaliyyətlə məşğul olmaq hüququndan məhrum edilib və 5 il 6 ay müddətinə azadlıqdan məhrumedilmə cəzasına məhkum olunub. Hazırda iş Sumqayıt Apellyasiya Məhkəməsinin icraatındadır. Şagirdini zorlamaqda ittiham olunan müəllim Ədliyyə Nazirliyi Penitensiar Xidmətinin Şüvəlandakı 3 saylı İstintaq Təcridxanasında saxlanılır. Xatırladaq ki, Şamaxı rayon Pirbəhli ümumtəhsil məktəbinin 9-cu sinif şagirdi olan qızın sözlərinə görə, tarix müəllimi Elnur İbrahimov onu gecə öz yaşadıqları evdə ayaqyoluna getmək istəyəndə saxlayaraq, zorlayıb. Elnur İbrahimovun 25 yaşı var. Ailəli olan müəllim 2 uşaq atasıdır. Şamaxıda kollec bitirən müəllim həmin məktəbdə 4 ildir ki, işləyirmiş.
