Metro istifadəçilərinin DİQQƏTİNƏ Bu stansiyalarda konsert olacaq – SİYAHI

Cəmiyyət

17:12 14.09.2017

Bakı Metropoliteni” QSC növbəti sosial layihəni gerçəkləşdirəcək.

Qurumdan BiG.AZ-a verilən məlumata görə, sentyabrın 18-də Azərbaycan xalqının dahi oğlu, musiqi mədəniyyətimizin korifeyi Üzeyir bəy Hacıbəyovun doğum günüdür. Həmin gün respublikamızda Milli Musiqi Günü kimi qeyd edilir.

Bu münasibətlə stansiyalarda artıq ənənə halını alan musiqili proqram təşkil olunacaq.

Metropolitendən istifadə edən sərnişinlərə bayram ovqatı bəxş etmək məqsədilə sentyabrın 18-i sərnişin axını daha çox olan bir neçə stansiyanın vestibülündə konsert proqramının təşkili nəzərdə tutulub. Proqramda milli və klassik musiqi nümunələri səsləndiriləcək.

Konsert proqramı aşağıda göstərilən stansiyalarda və vaxtlarda olacaq:

- “İçərişəhər” stansiyası - saat 12:00-13:30;

- “28 May” stansiyası - saat 13:00-14:30;

- “Elmlər Akademiyası” stansiyası - saat 14:00-15:30;

- “Memar Əcəmi” stansiyası (Bənövşəyi xətt) - saat 15:00-16:30.