Kəlbəcər girovu ailəsinə məktub göndərib

Cəmiyyət

11:12 25.11.2017

Erməni işğalçıları tərəfindən Kəlbəcərdə girov götürülən Şahbaz Quliyev ailəsinə məktub göndərib.

Mynews.az-ın xəbərinə görə, bu barədə AzVision.az-a girovun bacısı İradə Quliyeva məlumat verib.

“Bir müddət öncə qardaşım məktubunda xəstə olduğunu və xəstəxanada müalicə aldığını qeyd etmişdi. Bu yaxınlarda isə qardaşımdan yeni məktub aldıq. Məktubda Şahbaz səhhətinin normallaşdığını, müalicəsinin bitdiyini yazıb. O, həmçinin məktubda hər kəsə salam göndərib. Yazıb ki, mənə görə narahat olmayın. Şahbaz həm də həyat yoldaşı və qızı Elzaya da məktub yazıb”, - deyə İradə Quliyeva bildirib. 

Xatırladaq ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib. 

İşğal altındakı Dağlıq Qarabağda D. Əsgərov və Ş. Quliyev üzərində qanunsuz “məhkəmə” qurublar. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilmə cəzasına məhkum olunub.