Vaqif Əsədov azyaşlının həyatını riskə atan Abbas Bağırov barədə "Cəzalanacaq"

Cəmiyyət

18:49 20.02.2018

Əməkdar artist Abbas Bağırovun qanuna zidd olaraq azyaşlını qabaq oturacaqda əyləşdirərək (üstəlik, kəmər bağlamadan – red.) videosu yayılıb.

Bu görüntü sosial şəbəkədə müzakirələrə səbəb olub. Hər kəs Abbası buna görə kəskin tənqid edib. Məsələ ilə bağlı Bakı Şəhər Baş Dövlət Yol Polis İdarəsinin ictimaiyyətlə əlaqələr şöbəsinin rəisi Vaqif Əsədovla əlaqə saxladıq.

Yenicag.az-a açıqlama verən şöbə rəisinin hadisəyə münasibəti belə olub:

“Mən bu məsələni araşdıracam. Azyaşlının xüsusi oturacaq olmadan avtomobilin qabaq oturacağında əyləşməsi inzibati xətadır. Qəfildən əyləcə basıldığı zaman uşağın alnı şüşəyə dəyər və ağır xəsarətlə nəticələnə bilər. Mən o videogörüntünü nəzərdən keçirəcəm. Əgər deyildiyi kimi, belə bir inzibati xətaya yol verilibsə, məsələ araşdırılacaq, həmin şəxs kimliyindən asılı olmayaraq, qanun qarşısında cəzalandırılacaq”. V.Əsədov son vaxtlar bu cür hadisələrə tez-tez rast gəlindiyini bildirib:

“Bu yaxınlarda bir hadisənin şahidi oldum, musiqiçi əlini sükandan çəkərək klarnet çalırdı. Kəmər bağlamayan, yanında uşaq otuzduran insanlar hələ bir bunu çəkib, sosial şəbəkədə də paylaşırlar”.