Nazirlik: İçməli sudan texniki məqsədlər üçün istifadə olunur

15:31 31.08.2018

Cəmiyyət

Azərbaycanda Kür-Araz ovalığı, Abşeron yarımadası kimi düzən zonaları quraq ərazidə yerləşdiyindən yerli su ehtiyatlarımız məhduddur.

Mynews.az-ın məlumatına görə, bunu Ekologiya və Təbii Sərvətlər Nazirliyində keçirilən mətbuat konfransında nazirliyin mətbuat xidmətinin rəhbəri İradə İbrahimova deyib.

Onun sözlərinə görə, sudan bütün sahələrdə səmərəli və qənaətlə istifadə olunmalıdır:

“Təəssüf ki, bu gün ölkəmizdə içməli sudan ağacların suvarılmasında, avtomobillərin yuyulmasında israfçılıqla istifadə olunur. Çalışmalıyıq ki, bütün sahələrdə sudan istifadə edərkən su itkisi az olsun.

İçməli suya daha çox qənaət göstərməli, ondan texniki məqsədlərlə istifadəyə yol verməməliyik. Bu, yalnız dövlət qurumlarının deyil, bütün istifadəçilərin və əhalinin əsas məqsədi olmalıdır”.

İradə İbrahimova bildirib ki, Ekologiya və Təbii Sərvətlər Nazirliyinin fəaliyyətinin əsas istiqamətlərindən biri də bu sahədə əhali arasında geniş və hərtərəfli təbliğat aparmaqdır:

“Nazirlik tərəfindən su ehtiyatlarından səmərəli və qənaətlə istifadə olunması məqsədilə maarifləndirici videoçarx hazırlanıb. Ümid edirik ki, KİV videoçarxın yayımlanmasında yaxından iştirak edəcək və bu kampaniyaya dəstək verəcəklər”.

MƏNİM XƏBƏRLƏRİM

Cəmiyyət

Sizin üçün seçdik

İndi oxunanlar

Həftənin hitləri

Mynews.az