Sənədsiz ev problemi bu gün də ən aktual məsələ olaraq qalır. Yüz minlərlə şəxsin daşınmaz əmlakı hələ də dövlət qeydiyyatına alınmayıb. Müvafiq qurumlar həmin evləri işıq, su, qaz ilə təmin etsələr də, ancaq həmin evlərin sənədləşdirilməsi məsələsi problem olaraq qalmaqdadır.
Xatırladaq ki, Prezident İlham Əliyev sənədsiz evlərin sənədləşdirilməsi ilə bağlı müvafiq fərman imzalayıb. Buna uyğun olaraq işçi qruplar, komissiyalar da yaradılıb. Lakin bu problem hələ də öz həllini tapmayıb.
Maraqlıdır, on illərdir davam edən problemlə bağlı hansı yeniliklər var?
Mynews.az xəbər verir ki, mövzu ilə bağlı Redaktor.az-a açıqlama verən Milli Məclisin deputatı Vahid Əhmədov bildirdi ki, bir sıra dövlət qurumlarında bu istiqamətdə işlər davam etdirilir.
"Bu istiqamətdə işlər gedir. Əmlak Komitəsi də, Bakı Şəhər İcra Hakimiyyəti də bu yöndə işləyirlər. Dövlət başçısının sərəncamı da artıq hazır formadadır. Düzdür, mübahisəli məsələlər var, amma öz həllini tapacaq. Neçə vaxtdır ki, Prezidentin də bu barədə göstərişi var. Yaxın müddətdə problem həll olunmalıdır”,- deyə deputat vurğulayıb.
Millət vəkili hesab edir ki, dəmiryolu xəttinin üzərində, elektrik və qaz xəttinə yaxın olan evlərə sənəd verilməyəcək:
"Belə evlər kifayət çoxdur. Həmin şəxslərə başqa yerdən ev veriləcək. Yəqin ki mənzillə təmin olunacaqlar”.
