“Belə hesabla məğlub olduğumuza görə utanırıq. Belə olacağını gözləmirdik”.
Mynews.az Qafqazinfo.az-a istinadən xəbər verir ki, bu sözlər Serbiyanın “Mladost” klubunun baş məşqçisi Nenad Milovanoviçə məxsusdur. Luçani təmsilçisi Avropa Liqasının I təsnifat mərhələsinin ilk oyunları çərçivəsində öz meydanında Bakının “İnter” klubuna böyükhesabla məğlub olub – 0:3.
Oyunun ertəsi günü Serbiya mətbuatına müsahibə verən mütəxəssis fikirlərini bildirib. O, məşqçi karyerasında ən ağır məğlubiyyətlərdən birini aldığını deyib: “Bu, mənim 15 illik məşqçilik karyeramın ən pis oyunlarından biri idi. Meydanda istədiklərimizi və fikirləşdiklərimizi həyata keçirə bilmədik. Ümumiyyətlə, oyundan əvvəl qurduğumuz bütün planlar puç oldu”.
Mütəxəssis “İnter”in daha yaxşı komanda olduğunu etiraf edib: “Hesab hər şeyi sübut edir. “İnter” meydanda bizdən qat-qat üstün idi. Yaxşı müdafiə olundular və qapılarını toxunulmaz saxlamağı bacardılar. Rəqibin qollarına gəlincə, iki qolu standart vəziyyətlərdən buraxdıq. Bunlar Avropa səviyyəli qollar idi. Qapımızda gördüyümüz sonuncu qola isə şərh verməyə ehtiyac yoxdur. Təsadüfi alınsa da, möhtəşəm idi”.
Çalışdırıcı oyundan sonra futbolçuları ilə danışdığını söpyləyib: “Bu məğlubiyyət mənə çox təsir etdi və narahat oldum. Matçdan sonra futbolçularla söhbət etdim. “Partizan”a qarşı oyunda necə səhvlər etmişdiksə, “İnter”lə matçda da eyni ssenari ilə davam etdik. Əlimizə düşən imkanları dəyərləndirə bilsəydik, hesab fərqli ola bilərdi”.
O, cavab oyunu haqda da fikir bildirib: “Dediyim kimi, belə bir məğlubiyyət əldə etdiyimizə görə utanırıq. Amma özümüzü toparlamalı və cavab oyununa hazırlaşmalıyıq. Mərhələ keçmək şansımız çox azdır. Amma layiqli oyun göstərməyə, qələbə qazanmağa çalışacağıq”.
