Almaniyanın “Fortuna” klubunun futbolçusu Tuğrul Erat yenidən Azərbaycan milli komandasına qayıtmağı hədəfləyib.
Mynews.az-ın Report-a istinadən məlumatına görə, bu barədə 25 yaşlı yarımmüdafiəçi “Rp-Online” nəşrinə açıqlamasında bildirib.
O, Robert Prosineçkinin baş məşqçi təyinatından sonra yığmaya dəvət almadığını xatırladıb:
“Nənəm və nənəmin anasının Azərbaycanla bağlılıqları var. Bernhard Lippert Azərbaycanın 21 yaşadək futbolçulardan ibarət yığmasının baş məşqçisi olduğu vaxt mənimlə maraqlandıqlarını söylədi. Mən də müsbət cavab verdim. Berti Foqts əsas millinin baş məşqçisi olduğu vaxt məni tez-tez dəvət edirdilər. Lakin o, istefa verdikdən sonra dəvətlər dayandırılıb. Çalışacağam ki, özümü Robert Prosineçkiyə təklif edim”.
Qeyd edək ki, Tuğrul Erat ilk dəfə 2013-cü ildə Azərbaycanın U-21 yığmasına dəvət alıb. Növbəti il isə o, əsas milliyə çağırılıb və 2 oyuna çıxıb. Eratın Berti Foqtsun rəhbərliyi altında debütü 2014-cü il martın 5-də Birləşmiş Ərəb Əmirliklərinin Dubay şəhərində Filippinə qarşı olub - 1:0.
