Saxta "WhatsApp" əlavəsini yükləyən istifadəçilərin sayı bir milyonu ötüb

Texnologiya

21:51 06.11.2017

"Google" şirkəti məsələyə reaksiya verənədək bir milyondan çox "Android" istifadəçisi "Google Play" mağazasından "WhatsApp" messencerinin saxta surətini yükləyib. "WhatsApp" loqotipinə malik əlavə "Update WhatsApp Messenger" adlanır. Tərtibatçı adı rəsmi adla eyni olduğuna görə, əksər istifadəçilər bunu servis yenilənməsi kimi qəbul edib. Bunun üçün fırıldaqçılar "Unicode" standartında boşluqdan istifadə ediblər.

Mynews.az AZƏRTAC-a istinadən bildirir ki, məlumata görə, saxta əlavə yalnız digər proqram və servislərin reklam yeniləmələrini göstərir. Proqram təminatı bir milyondan çox istifadəçi tərəfindən yükləndikdən və "Reddit" saytında onun saxta olması barədə məlumatlar dərc edildikdən sonra "Google" şirkəti proqramı "Google Play" mağazasından silərək tərtibatçını bloklayıb.

Təhlükəsizlik üzrə mütəxəssislərin məlumatına görə, oxşar hadisə tez-tez baş verir. Mağazada mütəmadi olaraq "Facebook" və digər populyar əlavələrin saxta versiyaları yer alır. Məsələn, saxta "Facebook" versiyası 10 milyon dəfədən çox yüklənib.