Cənub bölgəsi gənclərinin karyera inkişafı istiqamətində “Turizm bələdçiliyi” bacarıqlarının artırılması - FOTOLAR

“İntellekt” Sərhədsiz Maarifçi Gənclər İctimai birliyi Azərbaycan Respublikasının Gənclər Fondunun maliyyə dəstəyi ilə Lənkəran şəhərində “Cənub bölgəsi gənclərinin karyera inkişafı istiqamətində “Turizm bələdçiliyi” bacarıqlarının artırılması” adlı layihəsini yekunlaşdırmışdır. Layihə çərçivəsində 20 nəfər gənc Lənkəran şəhərində 3 gün müddətinə “Turizm bələdçiliyi” mövzusunda həm nəzəri, həm də praktik təlimlərdə iştirak etmişlər. Belə ki, gənc iştirakçılar 2 gün müddətində Lənkəran şəhərində mütəxəssis tərəfindən keçirilən “Turizm bələdçiliyi” təlimində aktiv iştirak etmiş, növbəti 3-cü gün isə Lənkəran rayonunun mədəni-tarixi abidələrinə səfər etməklə təlimlərdə nəzəri olaraq öyrəndiklərini təcrübədə tətbiq etmək imkanı qazanmışlar.

 Layihənin məqsədi: Karyerasının başlanğıcında olan gənclərin mədəni turizmin inkişafına yönəldilmiş turizm bələdçiliyi istiqamətində nəzəri və praktik məlumatlılığını təmin etməklə onlarda bu sahənin inkişafına maraq oyatmaq və həvəsləndirmək. Eləcə də maddi gəlirləri aşağı gənclərin turizm bələdçiliyi sahəsində məlumatlılığını artırmaq, rəqabətə davamlı və keyfiyyətli turizm xidmətlərinin göstərə bilən peşəkar kadrlar hazırlamaq yoluyla bölgə gəncləri arasında işsizlik probleminin həllinə dəstək olmaqdır.

Layihənin rəhbəri Samir Axundov qeyd edir ki, Təlimlərdə praktik fəaliyyətlərin olması daha effektiv nəticələrin əldə edilməsinə əhəmiyyətli dərəcədə təsir göstərir və bu səbəbdən keçirilən layihə hazırlanma konsepti, təşkilatçılıq və əldə edilən nəticələr baxımından rayonun digər gənclərinin də marağına səbəb olmuş və növbəti bənzər təşəbbüslərdə iştirak üçün İntellekt təşkilatına müraciətlər qeydə alınmışdır.