İŞİD terrorçuluğu Yaxın Şərqi əhatə etdiyi bir vaxtda Ermənistanın ABŞ-ın müttəfiqi Azərbaycana qarşı təcavüzü dünya ictimaiyyəti tərəfindən diqqətə alınmır.
Mynews.az Trend-ə istinadən xəbər verir ki, bu barədə ABŞ-ın "Richmond Times-Dispatch" qəzetində dərc olunan məqalədə bildirilir.
Məqalədə mayın 18-i Laçın rayonunun işğal olunmasının 25 ilinin tamam olması vurğulanıb.
Qeyd olunub ki, Laçının işğalından sonra Ermənistan Azərbaycanın daha bir neçə rayonunu işğal edib və nəticədə 750 mindən çox azərbaycanlı yaşayış yerlərindən məcbur köçürülüb.
1994-cü ilin may ayında atəşkəs sazişindən sonra ermənilər qanunsuz köçürmə proqramını işə salıb. Məqalədə qeyd olunur ki, demoqrafik vəziyyətin dəyişdirilməsi üçün Ermənistandan və xaricdən Laçın rayonuna ermənilər köçürülüb.
Müəllif vurğulayır ki, ədalət naminə ABŞ Ermənistana təzyiq göstərməlidir ki, BMT Təhlükəsizlik Şurasının qətnamələri icra olunsun, Azərbaycanda qanunsuz yerləşən Ermənistan silahlı qüvvələri işğal olunmuş ərazilərdən çıxarılsın və Ermənistanın Azərbaycana qarşı təcavüzü mühakimə olunsun.
