512 rus və 200 azərbaycanlı terrorçu qadın saxlanılıb? İraqda İŞİD-çi qadınların müəmması

Dünya

20:17 09.11.2017

“Ölkə.Az” xəbər verir ki, bu barədə iraqlı millət vəkili Vian Dahil açıqlama verib. Onun verdiyi məlumata görə, İraq ordusunun İŞİD terror təşkilatına qarşı keçirdiyi əməliyyat nəticəsində 700-dən çox qadın saxlanılıb. Onun sözlərinə görə, saxlanılanlardan 512 nəfəri Rusiya, 200-ü isə Azərbaycan Respublikasının vətəndaşlarıdır.

“İraq ordusunun keçirdiyi əməliyyat nəticəsində 712 qadın İŞİD terror təşkilatı ilə əlaqəli olduğu üçün saxlanılıb. Onlardan 512-su Rusiya, 200-ü isə Azərbaycan vətəndaşıdır. Saxlanılanlar həbsxanaya yerləşdiriliblər”, - deyə millət vəkili bildirib.

Xəbərin ardından İraq hökumətindən məsələyə rəsmi münasibət bildirilib. İraqın Müdafiə Nazirliyi verilən informasiyanın həqiqətə tam uyğun olmadığını bildirib. Nazirlikdən bildirilib ki, İraq ordusunun keçirdiyi əməliyyat nəticəsində İŞİD terror təşkilatının çox sayda üzvü saxlanılıb. Lakin saxlanılanların sayı və hansı ölkədən olmaları dəqiqləşdirilməyib.